Martinez a ṭawng nâ

Man United-in Atletico Madrid an hneh loh zawhah Lisandro Martinez chuan club thuneitute a sawisel. Argentine defender chuan, "Atletico kha team ṭha tak an ni a, chak an phu. Keini lamah chuan hei aiin sum an sen tam ka beisei a, technical director (Jason Wilcox) aṭang hian tun aia ṭha hi kan beisei," tiin a sawi.

Martinez chuan sawi chhun-zawmin, "Dik taka sawi chuan player-te pawh tun aia ṭhaa khel tur kan ni a, chutihrualin zanin anga inkhel pawimawh chuan tun aia squad chhah ṭha hi a ngai a ni. Coach sawisel mai te a awl a, player sawisel pawh a harsa lo. Chutihrualin chak lohna chhan hi zau zawka thlir a ngai a ni," tiin club thuneitute thutluknaah a lungawi lo.

Man United hian tun hnaiah manager nghet neih an harsat a, tun hnai season hnih chhungin manager pahnih Erik ten Hag (October 2024) leh Ruben Amorim (January 2026) te an ban tawh. Martinez chuan, "Manager thlak reng ringawt hi a dik thei lo. Thil dang hi thlir tel a ngai, ka sawi belh zel erawh a rem lo. Season liam ta khan result ṭha tak kan nei a, bul ṭan theihna tur ṭha kan neih hmang ṭangkai lo," tiin a sawi.

World Cup nomawi chawi tawh Martinez hian kum khat chiah contract a nei tawh a, pawtsei turin thutlukna a la siam lo. Martinez-a thusawi hi thlawptu an ṭhahnem. Tun nipuiah United-in sum an hmang tam tawk lo a, Benjamin Sesko thlawptu tur striker lak belh a ni lo a, left back-ah Luke Shaw elpui tur player lak a ni lo. Nipui zarah midfielder pathum lakluh nan £155mtd sen a ni a, position dang player lak a ni lo.

Martinez ṭawng duh dan aṭangin team chhung boruak a ṭha tawk lo tih a lang a, a ṭhat belh lo bawk ang. Man United hi League Cup ṭangin an tla tawh a, Premier League-a an chet ṭhat loh avangin Michael Carrick hi ban theih dinhmunah a ding mek a, Italian manager Antonio Conte hming a ri ring hle.