Lille lakah Arsenal chak nuamsa

Premier League champion Arsenal-in Champions League lamah pawh result an neih ṭhat chhunzawm zel a, Thawhlehni zan khan an mikhual Lille chu 3-0 in an sawp - UCL match hnih an khelh tawhah an la chak ve ve.

Gunners tan defender Jurrien Timber chuan minute 64-naah goal hmahruai a khung a, Eberechi Eze leh Bukayo Saka ten goal khat ve ve an khung leh bawk - hun tawp thlengin goal dang a lut tawh lo a, 3-0 in Arsenal an chak.

Gunners boss Mikel Arteta-a'n squad a nei chhah ṭha tawk tih hriain, Leeds United hnehtu team aṭangin player panga ngawt a siksawi a, tlarhmaah Eze, Madueke leh Viktor Gyokeres te inkhel bul a ṭantir a, beisei erawh an phak lo.

Mahse, Arsenal-in first half-ah goal khung lo mah se, second half-ah an khung ta tho a, minute 64-naah Timber chuan Madueke ball pek chu um lutin, keeper Berke Ozer a pet khum a, striker goal niawma mawi a ni.

Arsenal-in goal an khung hnuah Arteta-a'n goal khung belh duhin, Kai Havertz, Saka leh Martin Odegaard te a rualin a luhtir a, a tisual lo chiang hle - goal hnih an khung belh.

Minute 67-naah Eze-a'n an goal hnihna khungin, Saka siamsak a ni - English forward hian minute 71-naah Havertz-a siamsak aṭangin a khung ve leh bawk a, goal luhna dang awm tawh loin, 3-0 in Arsenal an chak.

Arsenal hian tun season UCL match hnih an khelh tawhah hnehna an la chang ve ve a, Pathianni zan dar 9:00-ah Premier League match an khelh chhunzawm leh ang - khualmualah Nottingham Forest an lenchilh ang.