Olise insum loh Bayern-in an tuar

Bayern Munich-in Thawhlehni zan khan Champions League-ah Viking an hmachhawn a, 3-3 in an inhnehtawk. Viking Stadion-a inkhelah Viking-in Gianni Stensness leh Peter Christiansen te hmangin hma hruai hmasa mah se second half-ah German club-in Harry Kane goal hnih leh Luis Díaz te goal hmangin an lehthal.

Vincent Kompany hote tan point thum hlawhchhuah harsa tur niin lang tawh lo mah se minute 74-naah Michael Olise hnawhchhuah a ni. Olise hian ball a hloh hnuah Viking player a pawh avangin yellow card a hmu a, yellow card a hmuh rual hian ball hmangin Viking player hmaiah a vawm per a, yellow card vawi hnihna hmuin Bayern-in player 10-in an khelh phah.

Norwegian club Viking-in an tamna an hmang ṭangkai a, Herman Haugen-a'n minute 90-naah siphurh a sut. Bayern-in point thum hmuh theihna turah point khat chauh an hlawh chhuak a, October 21, Nilaini zana Arsenal an mikhual hunah Olise an chhawr thei lo bawk ang.