David-a goal hnih tawk lo

AFC Champions League Two-ah Thawhṭanni zan khan East Bengal-in Salt Lake Stadium-ah Al-Shorta SC an mikhual a, Mizo tlangval David Lalhlansanga'n goal hnih khung mah se Kolkata club hi 3-2 in a chak lo.

Vairengte tlangval David-a hian minute riatna lekah goal ṭha bik a khung a, box chhungah ball la thlain kawh zetin a volley lut a, Jeje Lalpekhlua vanglai ang mai a ni. Iraq Stars League club Al Shorta hian Ahmed Al Hajjaj (14') hmangin siphurh an sut nghal a, Mizo tlangval David-a hian minute 40-naah East Bengal hmahruaina goal a khung nawn.

Second half-ah Iraq club tan Hussein Ali al-Saedi (51') leh Kingsley Fidelis Kuku (53') ten an khung belh a, an chak dan erawh a awlsam lo. Al Shorta midfielder Abdoul Moumouni (Nigerian) chu minute 77-naah hnawhchhuah a ni a, Indian club East Bengal-in an tamna hman ṭangkai tumin na takin nawr mah se goal dang an khung belh thei lo.

David hian tun thla tir khan IFA Shield semifinal-ah NorthEast United lakah hattrick a siam a, 7-2 in an chak. Final-ah David hi khelhtir a ni lo a, Mohun Bagan lakah 1-0 a an chak loh zui avangin coach Antonio López Habas an sawisel nasat phah hle.

East Bengal tan David bakah Edmund Lalrindika leh Lalchungnunga nen bul an ṭan. Kolkata club hian match hnihah point hnih hmuin an group-ah pathumnaah an awm a, an chungah Al Shorta (6 pts) leh Al Hussein (4 pts) te an awm a ni.