Phuba latu Zemabawkin final an lut

Mizoram Basketball Association buatsaih Favang Tournament-ah Zemabawk Basketball Club chuan Thawhlehni zan khan, Mizoram Super League season 11 finals-a an hneh loh Khatla TBL lakah phuba an la a, hnehna ropui bik changin 86-83 in an chak a, final an lut.

Hello ZBBC

Inkhel ṭantir lamah TBL an che ṭha zawk a, first quarter-ah point 13 zeta hmahruai lai an nei hman. Mahse Zemabawk an insiamṭha ve nghal zel a, Michael Lalṭhakima leh Lalrinchhana te hmangin an hnaih vel zel.

Second quarter-ah Rinchhana a che ṭha lehzual a, Kulikawn rawlthar hian hla 'three points' vawi thum a luh bakah 'paint area'-ah a tal na tel a, an point inthlauhna a tizim. Lalropuia leh K. Lalthianghlima te pawhin a khat tawkin point an nei ve reng bawk.

Third quarter-ah erawh team pahnihte point a tang rei deuh a, TBL-in hma an hruai zel. Quarter dang aiin foul a tam zawk a, Zemabawk-in hmasawn zawkin 67-67-in an nihrual.

MSL champion lai team tan Vanlalṭhazuala leh Emanuel VL Awmpuia ten zan dang an pha lo tih a lang a, mahse player thiam bik an nih avangin Zemabawk tan harsatna an siam tho a, Hmangaihzuala'n (Miller) a thlawp ṭha viau bawk.

Fourth quarter-ah Zemabawk-in bul an ṭan fuh zawk a, Thianga'n a club hlui lakah point a rawn nei chho a, Michael-a'n a thlawp ṭha bawk. Chutihrualin Emanuel-a'nan inthlauhna zau lutuk tur a tizim vel zel.

Mahse defence-ah Rinchhana leh Hnehpuia te an ṭangkai takzet a, TBL-in ball an hloh ngun bawk avangin Zemabawk an dingchang ta zawk. ZBBC tan TBL an vawi khat hnehna a nih bakah, MSL finals-a anmahni hnehtu team laka an tho chhuak hi final-a inrintawkna petu tur a ni.

D League

Inkhel hmasa zawkah Chawnpui Basketball Club chuan final lut turin College Veng Basketball Club chu 68-49 in an hneh a, Lallianmawia leh RVL Lalhriatrenga te awmna club-in champion an hnaih.

Team pahnihte an intumtawk a, third quarter thlengin an inum dun zak zak. Mahse a tawpah player nei ṭha zawk Chawnpui an dingchang a, an kut lehlamin nomawi an dawm tawh.