Doncic tel loin Lakers an tlawm

Los Angeles Lakers chuan NBA season thar atana inbuatsaihna atan nimin zing khan Golden State Warriors nen an inhmachhawn a, Lakers hi an thiampuipa Luka Doncic tel loin 101-89 in an chak lo.

T-Mobile Arena, Nevada-a inkhelah hian Doncic hi club hruaituten chawlh an pek avangin a inlan ve lo a, hliam a nei lo niin khawthlang chanchinbute chuan an ziak.

Slovenian point guard tel loin Lakers an ṭha tawk lo a, Austin Reaves-a'n point 28 leh assist pasarih nei mah se thlawptu a neih ṭhat loh avangin Lakers tan a tawk lo.

Warriors erawh an ṭang rual ṭha a, Brandin Podziemski leh Yaxel Lendeborg ten point 17 ve ve an score a, Stephen Curry-a'n point 11 thawh vein Gui Santos chuan point 10 a score ve bawk. Warriors player 14 inlan zingah Dalen Terry leh Malevy Leons te chauhin point an nei lo.

Lakers hian season bul ṭan nan Warriors hi October 22, Ningani zingah an hmachhawn nghal dawn a, pre season-a hneh loh hi result duhawm lo a ni. October 17, Inrinni zing dar 8:00-ah Denver Nuggets nen friendly match an khel leh dawn a, JJ Redick-a naute tan insiamṭhatna hman a la awm