Spain tan Netflix-ah World Cup

Kum 2030 World Cup chu Spain ram chhunga en theihna chu Netflix chuan a chang ta a, champion lai ram tan American streaming company lianah hian World Cup an en a ngai dawn.

World Cup lo awm leh hmasa ber tur hi Spain, Morocco leh Portugal ten an inthlen ṭawm dawn a, kumin World Cup ang bawkin ram 48 inelna a ni leh dawn. Match 104 awm tur chu Netflix-ah hian chhuah a ni dawn.

Netflix hian inremna an siamah chuan inkhel awm ni apianga match pakhat tal chu, Spain ramah hian a thlawna en theih turin an chhawp chhuak ziah dawn a, Spain inkhel zawng zawng bakah semifinal pahnih leh final chu a thlawnin an chhuah dawn bawk.

Tun hnaiah Netflix hian infiamna lam an chhuah nasa a, boxing bakah NFL te an lo chhuah tawh a, kumin December 11 hian mipui hmuh châk Tyson Fury leh Anthony Joshua te inhnek chu chhuah turin inremna an siam tawh a ni.