India-ah Norris a tlan châk

Formula 1 champion lai Lando Norris chuan Indian Grand Prix a tlan châk thu a sawi a, India-a intlansiak thlen hun tur a nghakhlel hle.

McLaren driver hi India-ah a la kal ngai lo a, mahse junior formula-a a tlanpui ṭhin Indian driver Jehan Daruvala vangin India chanchin a hriat phah. Daruvala hian formula 2 a paltlang thei lo a, mahse Norris nen hian ṭhian ṭha tak an nih chhunzawm zel.

Kum 26 mi Norris chuan, "Simulator hmangin India-a track-ah hian ka lo tlan tawh a, a takah erawh ka la tlan lo. A takah simulator ang a nih chuan tlan theih ngei ka duh a ni. India-ah hian min ṭantu tam tak an awm tih ka hria a, F1 an ngainat zia a lang," a ti.

Indian GP hi Buddh International Circuit (BIC), Greater Noida-ah tlan ṭhin a ni a, Moto GP pawhin he track hi hmang ve ṭhinin a track design a fuh avangin an fak thei hle.

Mahse India sorkar chuan F1 chu infiamna ni loin ennawm angah a ngai a, chhiah tam tak pek a ngaih tak avangin kum 2013 hnuah Indian GP an tlan leh tawh lo. BIC hi driver tam takin tlan leh an châk a, an zingah Lewis Hamilton pawh a tel.

Tun hnaiah Indian GP nei leh turin hmalakna a awm ṭan a, India sports minister Mansukh Mandaviya chuan sum sen ngai tam mah se he inelna thlen leh ngei a tum hle.

Chutihrualin season thar atan F1 chuan ruahmanna a siam tawh a, ram hrang hranga F1 inelna thleng tur zingah India a la tel ve loh avangin 2027-ah India-in a la thleng dawn lo.