Wharton a tlawm dawn lo

Crystal Palace chuan an midfielder ṭhangduang Adam Wharton chu an hralh dawn a nih chuan, euro maktaduai 100 ai tlawma chhuahtir an remti lo niin khawthlang chanchinbute chuan an ziak.

Kum 22 mi Wharton hi tun hnaiah a che ṭha hle a, club lian tam tak chil tiputtu a ni. An zingah Spanish club lian Real Madrid an tel a, Jose Mourinho mit la zingah a tel pha.

Chutihrualin Real hian enthlak an ngah a, Wharton bakah hian Kees Smit, Manu Kone, Alex Scott bakah Scott McTominay te nen sawi zawm an ni. Season inṭan chauh mah se Portuguese coach-in January transfer a thlir lawk der tawh.

Hetihlai hian Eagles hian an player pawimawh an chân nasa a, Michael Olise leh Eberechi Eze ten an chhuahsan hnuah khatihlaia an coach Oliver Glasner a lawm lo a, an club hruaitute nen an thu a inhmuh loh avangin a chhuak.

English midfielder Wharton erawhin chhuah a duh thu a la sawi lo thung a, Selhurst Park-ah kum thum daih contract a la neih avangin man to taka ngamtu an awm a nih loh chuan a chhuah a rinawm loh.

Palace hian zanin dar 10:15-ah French club hlun Lyon nen Europa League an khel dawn a, khualmuala khel tur an nih avangin hnehna chan a awlsam dawn lo. Eagles tan Wharton chu an innghahna a ni leh dawn.

Eagles hian hliam vangin Dean Henderson, Jean-Philippe Mateta, Takehiro Tomiyasu leh Chadi Riad te an chhawr thei dawn lo a, tlarhmaah Ismaila Sarr chu chhawr theih ni mah se Daichi Kamada, Yeremy Pino leh Jorgen Strand Larsen te chu Pierre Sage-a'n a thlan a

rinawm zawk.