Galatasaray tan Barca an ṭha hret

La Liga hmahruaitu Barcelona-in Champions League-ah pawh an theihna sang tak an pholang a, Thawhlehni zan khan Galatasaray chu khualmualah 4-1 in an sawp. Turkish club hian Aleksey Batrakov hmangin khung hmasa mah se Barca-in João Cancelo, Fermin Lopez, Anthony Gordon leh Karim Adeyemi te hmangin an chhanglet.

Rams Park-a inkhelah Barca-in bul ṭan ṭha mah se Aleksey Batrakov-a'n minute 28-naah mualneitu tan a khung a, Catalan club an hawi hai. Turkish club goal bawh a na zui a, Rafael Leao a hlauhawm hle. Galatasaray hian Barıs Alper Yılmaz hmangin an khung belhah an inngai a, VAR hmanga ennawn hnuah pawm a ni lo.

Barcelona an insiamrem a, minute 43-naah Joao Cancelo hmangin si phurh an sut a, halftime-ah 1-1 a ni. Second half-ah Lamine Yamal telna Barca-in goal thum an khung belh a, Yamal-a'n goal khung lo mah se a che ṭha a, a ball pek a ṭha ṭhin hle.

Anthony Gordon-a'n Yamal-a ball fing a khung theih loh hnuah, Barca no. 10 hian ball ṭha dang pe nawnin Fermin Lopez-a'n a tauh lut. Minute 53-naah Yamal-a'n a thiam thil a pholang leh a, mawi zeta Galatasaray defender a bum hnuah a ball pek chu Gordon-a'n a khung.

Minute 65-naah Yamal ke aṭanga chhuak bawk chu Karim Adeyemi-a'n a khung. Barcelona an hmuhnawm chhunzawm a, substitute Gabriel Jesus-a'n hun ṭha bawhpelhin Catalan club-in goal dang an khung belh tawh lo. Yamal thiam zarah Barcelona 4-1 in an chak.