PSG hmaah EPL hmahruaitu City an zawr
Manchester City-in Premier League match ruk an khelh tawhah tlawm la nei lo mah se, a zawna Champions League nomawi chawitu Paris St-Germain an tawn meuh chuan dawl zawrin an zawr a, an mikhual lakah 4-2 in an tlawm.
PSG tan Désiré Doué, Ousmane Dembélé, Vitinha leh Maghnes Akliouche ten goal khat ṭheuh an khung a, City tana Erling Haaland-a goal hnih khungin awmzia a nei phak lo.
City-in EPL-ah rorel mah se, league pawn lama team ṭha an hmachhawnin a ropui lo. City hian Community Shield-ah 3-0 in Arsenal an ngam lo tawh a, tunah UCL-ah an tlawm leh ta.
Enzo Maresca team hian October 17, Inrinni zan dar 7:30-ah league match an khel lehnghal dawn a, Ipswich Town an mikhual ang - an chetsual leh vaih chuan, club thubuai nen buaina belhchhahin a awm ang.
Buaina 115
Tarlan tawh ṭhin angin, Manchester City-in thubuai 115 neiin thiam loh an chang a, an thubuai hi khinglet mek mah se, a tam zawkah chuan thiam loh an chan chhunzawm tho a rinawm - an hmabak a êng lo hle.
Thiam loh an chan hnua an match hmasa berah City hian Liverpool chu Anfield-ah 3-0 ngawtin an hneh a, thubuaiin an nunah nghawng a nei lo tih an pholang - Nilaini zanah UCL match an khel zui.
Mahse, Etihad Stadium-a an mikhual erawh coach tawnhriat nei ṭha Luis Enrique enkawl, a zawna European champion ni thei PSG an ni a, Liverpool nen thawnthu a inang thei lo!
Thiam loh chan hnua Etihad Stadium-a an inkhel hmasa berah City fan-ten an hmuh duh an hmu lo a, first half chhung ngawt pawhin Enzo Maresca team hian goal thum an chhuah hman.
PSG an ngai
French club hian tun season-ah rin loh takin Ligue 1 an ngam lo riau a, tun season-a league match ruk an khelh tawhah vawi thum chiah an la chak a, table-ah parukna an ni.
Mahse, Enrique-a'n Champions League-ah a zawna vawi thum champion an duh thu a sawi tawh a, a thusawiah a ding nghet. City lakah zahngaihna an lantir lo a, first half chhungin goal thum an khung hman!
Minute 13-naah Doue chuan box pawn aṭangin mawi em em maiin goal-ah a khung a, PSG keeper hlui Gianluigi Donnarumma-a'n tih theih a nei lo. Doue a insum lo - minute hnih hnu lawkah Ousmane Dembele tana tauh tura duhthusam a siamsak a, 2-0 a ni.
PSG-in a hmuna inkhel entu Pep Guardiola hmuh laiin City inkhelh an zirtir a ni ber. Minute 32-naah Maghnes Akliouche siamsak chu Warren Zaire-Emery chuan Vitinha tan a thai let sak a, Portuguese midfielder hian a hlah lo.
Thawhlehna beiseina
City-in mahni muala si thum phur chungin chawlhlawk an hmang a, Maresca-a'n thlak danglam ngai a hmu. Liverpool laka khel ṭha Jeremy Doku, Rayan Cherki leh Ruben Dias te second half ṭantirah a la chhuak nghal a, Matheus Nunes, Iliman Ndiaye leh Ayyoub Bouaddi a luhtir.
Maresca thutluknain awmzia a nei zui a, City-in si phurh sut ngei tumin an nawr na hle. Minute 53-naah Haaland kan hmu ta nge nge a, Norwegian striker hian Ndiaye siamsak chu si phurh sut ṭhen nan a hmang.
Mahse, City beiseina neih chhung a rei lo. Minute 62-naah Akliouche inlar ve lehin, Dembele siamsak chu goal-ah a chantir - Donnarumma-a'n dang zet mah se, ball hi a sawt leh a, goal-ah a lut ta daih!
City tan Haaland hian hattrick a siam teuh viau. Mahse, PSG keeper Matvei Safonov chuan mak tak maiin a dansak. French club-in Ferran Torres-a penalty hmangin khung belhna remchang nei mah se, Donnarumma chuan harsatna nei loin a dang a, mahse, hun tawp lam a nih tawh avangin 4-2 in PSG an chak ta tho.