Roma lakah Real an comeback

AS Roma lakah 3-1 a an hnufual hnuin Real Madrid an 'comeback' a, Spanish club ropui hian khualmualah Italian club hi 4-3 in an hneh - Jose Mourinho-a'n a team hlui a hneh a, UCL match hnih an khelh tawhah an la chak ve ve.

Stadio Olimpico-a inkhelah AS Roma ṭantuten ropui takin an coach hlui Mourinho an lo lawm a, Portuguese manager hian 2021-22 season-ah Europa Conference League-ah champion puiin, 2022-23 season-ah Europa League final a hruai thleng zui.

Italian club ṭantuten, 'The Special One' hnathawh hi an la hre reng a, banner nen ropui takin an coach hlui an lo lawm - a club lakah zahngaihna lantir an tum tihna erawh a ni lo a, chumi dikzia chu Marten de Roon-a'n minute 20-naah nemnghetin, yard 20 vela hla aṭangin goal hmahruai a khung.

Real Madrid an harh zawk a, Kylian Mbappe-a'n minute nga hnu lawkah si phurh sutna goal a khung. French striker tan UCL match 100 a khelh tlinna chiah niin, goal 72 a khung tling ta bawk a, a record a nep lo hle.

Goal dang lut loin chawlhlawk hman a ni a, second half-ah Roma bawkin goal an khung hmasa leh zawk! Minute 51-naah Donyell Malen chuan Vinicius Jr-a fimkhur loh chetsual rah chu thlum taka chantirin, an goal hnihna a khung.

Dutch forward hian minute 57-naah a khung belh leh bawk a, a tirah offside vangin pawm ni lo mah se, VAR a inrawlh hnuah pawmsak an ni a, Roma khelmualah 3-1 in Real Madrid an hnufual!

Serie A club coach Gian Piero Gasperini-a'n an goal neih sa humhim tumin, player a siksawi a, mahse, Mourinho-a'n chak ngei tumin player a luhtir ve tho - minute 59-naah Arda Guler leh Endrick te lut nghalin, a hnuah Bernardo Silva leh Carlos Espi an lut bawk.

Roma coach thutlukna aiin Mourinho thutlukna a fuh ta zawk. Minute 83-naah Carlos Espí chuan si phurh sut ṭhenin, minute hnih hnu lawkah Endrick chuan si phurh a sut zo der - minute nga a liam a, Real bawkin goal an khung.

Minute 90-naah Antonio Rudiger chuan Real tan goal a khung a, khualmualah Real an chak zui - Madrid khaw club-in goal li an khung a, goal hnih chu bench aṭanga lut Espi leh Endrick khung a ni a, goal hnih dang chu bench aṭanga lut tho Guler-a siamsak ve ve a ni.

Real hian tun season-a UCL match hnih an khelh tawhah Serie A club ve ve an tum a, Roma hma hian Inter Milan chu 2-1 in an lo hneh tawh bawk. La Liga lamah beisei an phak rih lo a, match riat khelh tawhah point rukin Barcelona an phak lo mek.