Punjab tan Messi a vul!

Indian Super League-ah Punjab FC tan Messi a vul a, mahse, i hriat ṭhin Lionel Messi erawh ni loin, Raphaël Messi Bouli a ni - Cameroonian striker hian goal hnih khungin, Odisha lakah a team chu 2-1 in hnehna a chanpui a ni.

Cameroon tan pawha vawi ruk lo inlan tawh Messi hian minute khatna lekah goal khung nghalin, Odisha an insiamrem hman lo! Mahse, Odisha tan Thoiba Singh chuan minute 15-naah khung ve lehin, team pahnih hi 1-1 in rei tak an inhnehtawk.

Thoiba goal khung hi K. Lalṭhathanga siamsak a ni a, Puitea corner pet aṭanga ball kal chu Thoiba hian a lo tauh lut - team pahnih hi 1-1 in an inhnehtawk mai dawn niin a lang tawh a, mahse, beisei loh thil a thleng zui.

Hun pek belh minute ruknaah Messi bawk inlarin, Punjab goal hnihna a khung a, Odisha tan chhanglet turin hun a awm tawh lo - goal dang a lut tawh lo a, 2-1 in Punjab FC an chak.

Punjab-in Mizo player kawl an nei lo a, Odisha tan Puitea bakah Vanlalzuidika Chhakchhuak chuan inkhel bul ṭanin, K. Lalrinfela chu bench aṭanga luhtir a ni bawk.

ISL hi zaninah khelh chhunzawm tur niin, SC Delhi leh Mohun Bagan te zan dar 7:30-ah an intawng dawn a, team pahnih hi an match hmasa bera tlawm ve ve an nih avangin an tan chak a pawimawh dawn.

Bagan hian Lalengmawia Ralte (Apuia) leh Lallianzuala Chhangte an kawl a, SC Delhi hian Lalrinliana Hnamte leh Augustine Lalrochana te an nei thung.