Aston Villa-in goal ruk an khung!

Premier League lamah beisei phak lo mah se, Champions League lamah Aston Villa an tal na hle - Nilaini zan khan Turkish club ṭha Fenerbahce chu 6-0 tehmeuhin an sawp a, Unai Emery hote hian UCL match hnih an khelh tawhah hnehna an la chang ve ve!

Villa Park-a inkhelah English club-in an mikhual club lakah hawihhawm an chhuah duh lo a, minute 12-na aṭangin goal an lo khung ṭan. Villa player man to ber Johan Manzambi-a shot chu an lo dan per avangin City keeper hlui Ederson-a'n a chhut sual a, Turkish club-in goal an chhuah nghal.

Hetah hian a la tawp mai lo - Nicolas Jackson hun a inher chhuak a, Chelsea striker hlui hian top level khel tur a ni tih pholangin, goal hnih a khung a, first half-ah 3-0 a hmahruai chungin chawlhlawk an hmang.

Villa tan Zion Suzuki-a'n hna a nei lo a ni bik lo. Japanese keeper hian Vedat Muriqi-a khung ngei tur nia lang chu vawi hnih ngawt ṭha zetin a dansak a, Oguz Aydin-a hun ṭha neih pawh dansakin, bar a per zui.

Mahse, team pahnih danglamna chu tlarhnung a ni a, Turkish club hian Nelson Semedo, Milan Škriniarm, Nathan Ake leh Archie Brown te tlar thei mah se, tlarhnung a nghing a, Villa-in an rum ṭhaih apiangin an talbuai a ni ber!

Minute 68-naah Manzambi chuan penalty hlawh chhuak zuiin, Jackson-a tan hattrick siamna remchang ni mah se, a pet turin Ross Barkley a lo pen chhuak a, English midfielder hian goal-ah a chantir - minute 72-naah a belhchhah zui.

Villa hi 5-0 in an chak mai dawn niin a lang tawh a, mahse, hei hi an tawpna a la ni lo cheu! Minute 90-naah Tammy Abraham chuan chak nemnghehna goal a khung a, Villa a chakpui.

English club hian Club Brugge chu khualmualah 3-2 in an lo hneh tawh a, hmabakah Barcelona leh Paris St Germain te an la awm avangin Emery-a tan club vantlang lo hneh hmasak zel hi a pawimawh.

Villa hi UCL match hnihah vawi hnih chak mah se, Premier League lamah erawh an ropui rih lo viau. League match ruk khelh tawhah vawi khat chiah an la chak a, table-ah 16-na an ni mek - Inrinni zan hian Newcastle United chu khualmualah an lenchilh ang.