Man United hi 'circus' ang chauh a ni - Keane

Champions League-ah Manchester United-in Atletico Madrid a hneh lo a, inkhelh banah defender Lisandro Martinez-a'n club thuneitute na takin a sawisel. Roy Keane chuan a club hlui boruak awm dan chu 'circus' ang chauh a nih thu a sawi.

Argentine defender Martinez chuan nipui bazarah Man United-in squad thuam chak nan sum an seng tam tawk loa a ngaih thu a sawi lang a, technical director Jason Wilcox thlengin a sawisel. Chutihrualin Man United defender Martinez hi a insawifiah leh tawh tho a, chak loh thinrim puak chhuak a nih thu a sawi.

The Overlap podcast-ah Keane chuan, "Fan ṭhenkhatin sawi ṭha an ti ang a, a ṭhenkhatin team a tihnual an ti ang. A bik takin player an theihna anga la khel chhuak lo tan chuan pawm thiam a har dawn. Kei ka thlirnaah chuan club dinhmun a langin ka hria a, club chhung a buai a, circus ang mai an ni," tiin a sawi.

United captain hlui Keane chuan sawi chhunzawmin, "Hetiang ang hun harsa han tawn hi chuan United player-te hian ṭawngkam na tak hman hmain darthlalangah inen se, anmahni inenfiah hmasa se ka ti," tiin player-te chu mawhphurhna la ngam tur an nih thu a sawi lang.

Liverpool captain hlui Steven Gerrard chuan, "Tottenham nena an inkhelh chungchang a sawi lang lo a, a tihsual vangin Solanke-a'n goal a khung. Ngawi hmak se, goal venhim hna thawk rawh se," tiin Lisandro Martinez chu ṭawng loa khelmuala a hna ti turin a hrilh.

Michael Carrick-a hote hi League Cup-ah an tla tawh a, September 11-a Sabah (Champions League) an hneh hnuah chak hmel an hmu leh tawh lo. October 18, Pathianni zan dar 6:30 hian Elland Road-ah Leeds United an tlawh dawn a, an chak lo a nih chuan Carrick-a dinhmun pawh a him tawh lo ang.