Southgate-a'n Premier League kir a tum rih lo

England manager hlui Sir Gareth Southgate chuan Premier League club enkawl tumna rilru a neih loh thu a sawi. Southgate hian Euro 2024 khan Three Lions chu final a thlenpui a, Spain hneh loin an ram team enkawl hna a chawlhsan.

Southgate hian England manager hna a chelh hnuah team a la enkawl lo a, The Amol Rajan Connection podcast-a a inlan ṭumah Premier League team enkawl tumna a neih loh thu a sawi. English manager chuan, "Tun dinhmunah chuan Premier League team enkawl tumna ka nei lo. England team ka enkawl tawp lam khan team enkawl nuam tihna ka nei lo a, mahse hnehna kan chan chhoh avangin kan kal chho zel a ni," tiin a sawi.

Kum 56 mi Southgate hian England a enkawl hmain kum thum chhung Middlesbrough a enkawl a, English football-ah sulhnu a nei ṭha. Southgate chuan, "Cyrstal Palace-in an nomawi hmasa ber an chawi khan a hmunah ka en a, FA Cup final hnuah khan football ground-ah ka kal leh tawh lo. Ka rilru put hmang pawh a inthlak nasa hle," tiin a sawi.

Southgate hian Boston-a Harvard Business School-ah guest lecturer hna a thawk mek a, English manager chuan, "Thla 18 chhunga ka hnathawh hi nuam ka ti hle. Kum 37 chhung kan hmalam hun chak leh chak loah a innghat a, thil thar hmachhawn hi nuam ka ti. Politician te ka hmu a, media lama thawkte ka hmu a, khawvel hrang hrang ka zin kual a, ka thil tih mek hi nuam ka ti," tiin football-a inhman a tum rih loh thu a sawi.