Windies-in India an hneh let

West Indies chuan Nilaini zan khan India chu run 24-in an hneh a, T20 series khelh mekah 2-2 in an inhnehtawk. Match tawp ber hi Bengaluru-ah October 17, Inrinni zan dar 7:00 hian an khel ang.

India-in vawm hmasak an thlang a, Windies lam batter-te an che ṭhat avangin target sang tak an siam. Shai Hope-a'n century (102) a siam zarah mikhual team hian run 247 an vaw chhuak a, wicket thum chauh an hloh.

India tan Sanju Samson-a'n half century (56) a siam bakah Tilak Varma (43) leh Nitish Kumar Reddy (41) ten run 40 siam tling mah se Windies bowler Keemo Paul an ngam lo. Kum 28 mi Keemo hian wicket nga lain run 45 chauh a pe a, India hian over 19.3-ah run 223 siamin an thi fai vek.