Six Kings Slam tennis exhibition hun sawn

Grand Slam champion Carlos Alcaraz, Novak Djokovic leh Alexander Zverev te telna tur, ni thum awh Six Kings Slam tennis exhibition chu October 21, Nilaini aṭanga ṭan tura ruahman ni mah se Saudi Arabia a him loh avangin sawn a ni.

Tennis exhibition lian tham hi Riyadh-ah neih tur a ni a, tennis player langsar fuankhawmna tur ni mah se hel pawl lakah Saudi Arabia a him lo. Inrinni liam ta khan Yemen-a Houthi helte’n missile hmangin Riyadh-a thlawhtheihna ṭum hmun an kap a, mi 13 an thih bakah mi 300 chuang an hliam a, exhibition match hi kaltlangpui chi a ni lo.

Inelna neihna tur ANB Arena hi Riyadh hmar lama awm a ni a, King Khalid International Airport aṭangin 31 km chauha hlaa awm a ni. Hel pawlin Saudi an beih avangin Saudi Pro League match ṭhenkhat khelh hun pawh sawn a ni a, inkhelh hun sawn zingah Cristiano Ronaldo khelhna Al Nassr pawh an tel a, Al Ahli nena an inkhel tur chu nakkum March thlaah sawn a ni.