Buka awm tur MLS FC leh Kanan FC

Star Cement MPL13 league round a zo dawn ta a, vawiin hian relegate tur a chiang dawn. Tun dinhmunah Lawngtlai club MLS FC chu table mawngphahah an awm mek a, an chung chiahah Kanan FC an awm bawk. MPL-ah table hnuai bera awm an relegate ṭhin a, pasarihnain relegation playoff an khel ṭhin.

MLS FC-in vawiin tlai dar 3:00 hian Chanmari FC an hmachhawn dawn a, point khat an hmuh chuan pasarihnaah awmin relegation playoff a khel thei dawn. Lawngtlai club hi head to head-ah Kanan aiin an ṭha zawk a, hei hi an vanneihpui thei. Chutihrualin point khat hi himna a la n ilo a, zan lama Aizawl FC leh Kanan FC inkhel result an ngaihchân tel a ṭul dawn.

Kanan hian Aizawl FC laka point thum an hmu a nih chuan an him ngei dawn a, mah se League Winner laka chak hi a harsa dawn. Nizan lamah Ramthar Veng chak lo pawh ni se, head to head-ah an tluk chuang loh avangin relegation playoff pumpelh tur chuan chak ngei a ṭul dawn a, KFC hmabak a hautak hle. Kumin hi MPL relegation battle boruak san ber ṭum a ni.