A vawi khat nan East Bengal

Tun season Indian Super League-ah East Bengal an la inlan ve lo a, Kolkata club hi a vawi khat nan Pathianni tlai dar 5:00-ah an inlan dawn - khualmualah Churchill Brothers an lenchilh ang.

East Bengal hian AFC Champions League Two an khelh avangin ISL hi an la khel ve lo a, ACL Two-ah hian Iraq club ṭha Al-Shorta chu 2-3 in an ngam lo - David Lalhlansanga'n goal hnih a khung.

ACL Two-ah hian East Bengal hian match hnih khel tawhin, point khat an hmu a, Indian football lamah an inlan ve leh dawn ta. David-a'n Asian football a ngam a, ISL-ah Antonio Habas-a'n a chhawr chhunzawm ang em, tih chu zawhna a ni mek.

East Bengal-ah hian David-a bakah, defender Lalchungnunga, midfielder Vanlalpeka Guite leh forward Edmund Lalrindika te an awm bawk a, tun season ISL-a Mizo player kawl tam pawl an ni.

Pathianni zan dar 7:30-ah Mohun Bagan hnehtu NorthEast United chuan Kerala Blasters an mikhual dawn a, Highlander-ah hian Mizo midfielder Mark Zothanpuia leh striker Lalrinzuala te an awm.

Blasters hian midfielder Freddy Lallawmawma, R. Lalthanmawia, Paul Ramfangzauva, Joel Ramengmawia leh forward Ramhlunchhunga te an enkawl a, Kerala club hian an match hmasa berah Inter Kashi chu 2-0 in an hneh ve bawk.

Inrinni tlai dar 5:00-ah Laldinliana Renthlei khelhna Inter Kashi chuan Odisha an mikhual dawn a, club pahnih hi an match hmasa bera tlawm ve ve an ni - Odisha hian midfielder K. Lalṭhathanga (Puitea), K. Lalrinfela, defender Vanlalzuidika Chhakchhuak leh Jeremy Zohminghlua an kawl.

Lalremtluanga Fanai leh Lalthuammawia Ralte neitu Bengaluru chuan Inrinni zan dar 7:30-ah Chennaiyin an mikhual ve dawn bawk - an mikhual tur club-ah hian defender PC Laldinpuia, midfielder Ayush Chhetri leh C. Lalhriatpuia te an awm.

Bengaluru hian an match hmasa berah SC Delhi chu 3-2 in an hneh a, Chennai club hian khualmualah FC Goa chu 1-1 in an inhnehtawkpui thung.