Chawlh hun hmang ṭha Chelsea

Chelsea-in Xabi Alonso hnuaiah beisei angin season bul an ṭan lo a, mahse, international break hman zawh hnuah erawh an danglam - Bournemouth chu 5-1 in an sawp a, Blues hi kar thum ngawt international break awm chhawr ber an ni mai lo maw? tih theih hial a ni.

London club hian international break hmaa an match hnuhnung berah khan Brentford hmachhawnin, khualmualah EPL club vantlang hi 3-0 ngawtin an ngam lo a, Xabi Alonso leh a naute tan chuan mualphona a tling.

Mahse, international break-in a zui a, Chelsea-in hliam chhuanlamin, an player engemaw zat an chhuahtir lo a, international break a zawh meuh chuan Blues hi team danglam an ni a, a tuartu chu Bournemouth a ni.

Kar hmasa Premier League a zo a, Chelsea elpui club lianten European football an khel a, London club erawh hahdamin an lo awm thung. Blues hian vawiin tlai dar 5:00-ah Everton an lenchilh dawn a, club dang aia an khelh tlemna hi an chhawr leh thei ang em? tih chu kan zawhna a ni mek.

Danglamna chu

Chelsea-in Xabi Alonso hnuaiah goal an khung thei viau a, chutih ruala an buaina chu goal chhuah an hrat tel chu a ni. Cole Palmer, Morgan Rogers leh Joao Pedro te zarah goal an khung leh mai zel a, an mualpho lutuk tur thupin a awm.

Alonso-a'n tlarhnung tihphui dan a zawng reng a, a midfield thawl lutuk ṭhin lah buaipui tham a ni. Cherries lakah ṭum dang aiin an tawlh hnung ta hret a, an goal nawr dan an her danglam ta hret bawk.

Inkhelh zawhah a rah thlum tak an lo a, Chelsea an hlim. Pedro chuan, "International break a rei a, duh ang thala hnathawhna hun min pein, Brentford laka kan tihsualte pawh kan zir hman a, result ṭha tak kan neih phah a ni," a ti.

Pedro hi Brazil boss Carlo Ancelotti-a'n a squad-ah telh mah se, a khup hliam chhuanlamin Selecao squad a zawm duh lo a, Cherries lakah bul ṭanin, goal hnih a khung thung.

Caicedo a lo kir

Chelsea chakna langsar tak pakhat chu Moises Caicedo a lo kir kha a ni bawk. Ecuadorian midfielder hi hliamin a tlakbuak a, Cherries a hmachhawn hma khan tun season EPL-ah minute 14 bak hun a hmang hman lo.

Caicedo a lo kir a, ball a keng thei a, midang ball ken lai a chhuhsak thei a, Chelsea midfield zuamawm tak ṭhin a thlak danglam.

Alonso chuan, "Caicedo kan neih let hun hi nghakhlel takin ka thlir reng a, ani a lo kir chuan, khelmual chhungah a nih tur ang takin thil a awm vek tih theih a ni. Kan player pawimawh a ni a, a lo kir leh ta hi kan tan chuan chanchin lawmawm a ni," a ti.

Caicedo hi midfielder tawnhriat nei ṭha Jordan Henderson nen an inkawp fuh tel bawk a, Alonso tan an pahniha rin zui zel a fuh hial mai thei - Cherries lakah Hendo hian goal 'cial' pahnih a khung tih theihnghilh suh.

Training hun

Chelsea-in international break laiin senior player 16 vel ram tana feh chhuak loin an kawl thei a, club academy player-te nen pangngai takin training an lo nei - kha kha an chhawr tih a chiang.

Cole Palmer phei chu England boss Thomas Tuchel-a'n ram tana inlanna chance a bawhpelh nasa mah mah ang hialin a sawi a, mahse, khelmualah Blues-in an ṭhatpui miau avangin pawi an ti lo ang.

Tun karah pawh Premier League club lian dangten European football khelin an zin chau hlawm a, ni hnih dan lekah te match an nei hlawm. Blues erawh kar khat inbuatsaihna an nei thung.

London club tan UCL khelh phak loh hi thil tlawm thlak tak ni mah se, season hmasaa thil thleng chu thlak danglam theih a ni tawh lo a, ui taka thlirlet aiin malsawmnaa chantir chu an tan a finthlak ang.