4th State Level Red Run 2026 a hlawhtling

Mizoram State AIDS Control Society (MSACS) leh Mizoram Athletics Association te buatsaih 4th State Level Red Run 2026 chu nimin khan hlawhtling taka neih a ni a, mipa inelnaah Mualpui tlangval Lalhmunmawia (Amawia) chu pakhatna niin hmeichhe inelnaah Pachhunga University College zirlai H. Ngohlaso chu pakhatna a ni thung.

Tun ṭum inelnaa pakhatna leh pahnihna te hian November 3, 2026-a Patna-a neih tur hi National Red Run 2026-ah Mizoramah aiawhin an tel ang. State Level Red Run vawi linaah kum upa ber leh naupang ber tan a vawi khat nan lawmman siam a ni a, kum 38 mi Jonathan MS Kima (Mission Veng) leh kum 11 mi Lalnunhlui Pachuau (Tuikual South) te hnenah hlan a ni.

Nimin zing khan State Level Red Run khan neih a ni a, R. Dengṭhuama Indoor Stadium aṭangin an tlan ṭan a, South Tuipui bialtu MLA Jeje Lalpekhlua chuan tlante hi a vai liam. Mi 500 chuang in 10km an tlan. R. Dengṭhuama Indoor Stadium aṭanga tlan ṭanin Silai mual-World Bank Road-ah kualin an tlan ṭanna hmun R. Dengṭhuama Indoor Stadium-ah an kir leh a ni.

Jeje chuan tlan zawng zawngte chu tihdam theih loh natna HIV kai lo tura fimkhur tlat turin a chah a. 4th State Level Red Run 2026-ah hian HIV Testing Booth siam a ni a, mi 100 chuangin test hi an nei a ni.