Jeje-a'n MFA Starlight Football Project a hawng

MFA Starlight Football Project for Girls Season 2 chu October 15, Ningani khan South Tuipui bialtu MLA leh India international hlui Jeje Lalpekhlua'n Lammual-ah a kick off. He project hnuaiah hian zirlai hmeichhe naupang mi 150 chuang football zir turin an inziak lut a ni.

MFA Starlight Football Project for Girls Season 2 (2026-2027) hi Mizoram Football Association (MFA), Mizoram State Sports Council (MSSC), Women & Child Developement, Govt. of Mizoram (WCD) leh Mizoram State Aids Control Society (MSACS) ṭangkawpin an buatsaih.

He project hnuaiah hian zirlai hmeichhe naupang mi 150 chuang football zir turin an inziaklut tawh a. Hmeichhe naupang talent nei ṭha tak takten hmasawnna an neih zel theih nan, he project-ah hian MFA leh school 10 an thawk ho.

Zirlaite hi middle school leh high school zirlaite an ni a, practice remchan theihna turin zone thumah ṭhen a ni. Lammual, Chatlang leh Joint YMA Field (Vaivakawn)-ah training neih a ni dawn a, heng ground awmna mil hian school-te hi zone thumah ṭhen an ni.