Khualmualah Palace chak lo

Premier League club Crystal Palace chuan Ningani zan khan Lyon tlawhin Europa League an khel a, Conference League champion lai Palace hi 3-2 in an chak lo.

Lyon tan Corentin Tolisso, Ernest Nuamah leh Pavel Sulc ten goal khat ṭheuh an khung a, Palace tan Yeremy Pino leh Daichi Kamada te goal khung chu scoreline timawitu a ni thung.

Groupama Stadium, Lyon-a inkhelah mual neitu team tan Tolisso-a'n minute riatna lekah corner aṭangin an hmahruaina goal a khung a, first half tawp hma hretin Nuamah chuan an hmahruaina a belhchhah bawk.

Second half-ah Eagles an insiamṭha hret a, ṭan aṭanga minute ngana lekah Adam Wharton-a pass ṭha tak chu Pino-a'n an siphurh sut nan a khung a, Palace an phur sawt.

Mahse Eagles-in goal an khung dang khung an harsat a, Lyon-in vuak let a na thei hle. Minute 74-naah Sulc chuan mawi taka kheng lutin an goal thumna a khung a, awlsam taka an chak mai a rinawm hman.

Eagles erawh an beidawng lo a, Japanese midfielder Kamada-a'n minute 82-naah goal khung lehin a team beiseina a siamsak. Hun tawp hma hretin Chris Richards chuan an siphurh a sut zo teuh hle a, Lyon keeper Dominik Greif-a'n ṭha takin a dang. Hun tawp zui nghalin Palace an tlawm.

Inkhel dangah Sunderland chu khualmualah an chak ve thung a, Black Cats hian Portuguese club Torreense chu 2-1 in an hneh a, Bournemouth chuan 3-0 in Sturm Graz an hneh ve bawk.