Raphinha-a'n training a zawm

Spanish champion Barcelona training lai thlalak tarlanah Raphinha hmuh tel a ni a, Brazilian forward hi thla hmasaa a inhliam hnua a training hmasa ber niin zanina Real Betis an hmachhawn hunah squad-ah a kir leh tawh dawn niin Spanish chanchinbute chuan an ziak.

September 29 zana Brazil leh Australia-in friendly match an khelh ṭumin Raphinha hian penalty a petna lamah a malpui ding lam a tina a, endik a nih hnuah a chawlh a ngaih avangin India hmachhawntu zingah a tel ve thei lo.

Kum 29 mi Raphinha awm lo hi tlarhmaa duhthlan tur nei tlem Barca tan chânna nasa tak angin lang mah se, a awm loh chhungin Gabriel Jesus a rintlak a, Dani Olmo-a'n striker hna a chelh bawk.

Catalan club hian nipui lai khan tlarhmaa khel thei Robert Lewandowski, Marcus Rashford leh Ferran Torres te an chhuahtir a, a thlakna tura an duh Julian Alvarez leh Lautaro Martinez te an lak theih loh avangin Raphinha hi striker-ah an hmang.

Striker dang an lak hmain Raphinha hian rinrawla hman iaiawm loh khawpin a khel ṭha a, Jesus-a'n Barca a zawm hnuah pawh che ṭha zelin inelna hrang hrangah match riat khelin goal 14 a khung tling tawh a, a hnampui Jesus-a tan pawh nek chhuah a harsa tawh ang.

Chutihrualin Raphinha hi damkawr a nih avangin squad-ah a awm a nih pawhin bul a ṭan a rinawm loh a, Olmo emaw Jesus-a'n a hmun ruak an hnawh khah a rinawm zawk.