Thla khat chawl tur Martinez

Serie A Champion lai Inter Milan chuan forward Lautaro Martinez chu a hliam endik a nih hnuah a chawlh rih a ngai dawn a, a tlem berah thla khat bawr vel inenkawl a mamawh dawn niin an tarlang.

Kum 28 mi Martinez hian Thawhlehni zan Champions League-a Club Brugge an hneh loh ṭumin a malpui vei lam a tina a, minute 90 khel thei mah se beisei aiin a hliam na.

Argentine forward hian tun season bul a ṭan fuh hle a, inelna hrang hrangah match sarih khelin goal ruk leh assist pakhat a nei tawh. Inter-in nipui transfer laia Barcelona-a an kaltir lo chu tifuh an inti rih viau ang.

Chutihrualin Martinez hi hliamin a tlakbuak zing a, season hmasa pawh khan Serie A top scorer ni mah se a inhliam avangin a inkhel hnem tawk lo a, a awm loh hlanin a team chu UCL aṭangin an pet chhuak.

Tun season-ah pawh Martinez a inhliam leh der tawh a, thla khat a chawl dawn a nih chuan October 31, Inrinni zana an hmelma AC Milan an tlawh hunah a inlan ve thei dawn lo.

Cristian Chivu-a naute hian zanin dar 9:30 hian Bologna an lenchilh dawn a, Inter hian chak loh an la nei lo a, hmahruaitu ni mekin point hmuh zat inangah goal difference an neih ṭhat zawk avangin Lazio aiin an sang zawk.