Olise chet dan âtthlak titu Matthäus

German football legend Lotthar Matthaus chuan Champions League-a Bayern Munich forward Michael Olise hnawhchhuah a nih dan chu insumtheihna a tlakchham avang a nih thu a sawi a, âtthlak a ti hle.

Thawhlehni zan khan Bayern hian Viking an hmachhawn a, 3-2 a hma an hruai laiin Olise hian Viking player Henrik Heggheim chu hnung lam aṭanga a pawh hnuah yellow card a hmu a, French forward hian duhtawk mai loin captain Zlatko Tripic hmaiah ball-in a vawm leh a, hnawhchhuah a ni zui.

Hemi hnu hian a tam zawk an nihna hmang ṭangkaiin Viking-in an siphurh an sut a, 3-3 in inkhel a tawp. Mi tam takin Olise insum zawh loh vangin an dem a, an zingah Matthaus a langsar.

Kum 65 mi Matthaus chuan, "Olise te ang player thiam hi chu game chhunga rilru fim pu thei lo turin an khingpuiten an duh a, mahse Olise pawh kha tihthinrim châkawmin a awm ve tho.

A tawpah chuan amah chauhin a tuar lo a, team pumpuiin an tuar tih a hriatthiam a ngai. A thil tih kha a âtthlak ka ti takzet a, referee hmuh loh lai pawhin khatiang thil kha tih tur a ni lo," a ti.

Red card a hmuh avangin Olise hian October 21, Nilaini zana Arsenal nen an inhmachhawn hunah a khel ve thei dawn lo a, Bavarians tan Premier League champion laka Olise an chhawr thei lo tur hi chânna nasa tak a ni.

Hetihlai hian Olise hi Nike nen thawkdun turin inremna an nei a, an inremna zat hi tarlan a ni lo thung. Kum 24 Olise hian 2018-a an tihtawp tawk Nike Hypervenom Phantom III chu a phawrh chhuak leh dawn niin khawthlang chanchinbute chuan an tarlang.

Bayern hian zanin dar 10:00-ah RB Leipzig an mikhual dawn a, Olise a khelh ngei a rinawm. Pathumnaa awm mek Bayern hian hmahruaitu ni turin Borussia Dortmund leh Bayer Leverkusen te chetsual an châng mek a ni.