Getafe-in Jadon Sancho an duh

Manchester United-a a contract a hman zawh hnua, club nei loa awm mek Jadon Sancho chu Getafe-in lakluh tumin an dawr a, he thu buatsaih a nih lai hian English forward hian an dawrna hi a pawm dawn em, hriat a la ni lo.

Sancho hian kum 2021 khan Borussia Dortmund chhuahsanin, Manchester United chu pound maktaduai 73-in a zawm a, mahse, Old Trafford-ah beisei angin hun a hmang lo - United a cham chhung hian Dortmund, Chelsea leh Villa-ah te loan-in a khel hman.

Kum 26 mi Sancho hian season hmasa kha Aston Villa-ah loan-in a khel a, inelna hrang hrangah match 39 khelin, goal khat chiah a khung a, Europa League nomawi a chawi bawk.

Sancho hian United-a a cham chhungin European football-ah final vawi thum a khel hman a, mahse, United tan a ni lo vek thung! Dortmund-a loan-a a kir khan Champions League final a luhpui a, mahse, an chak lo.

Chelsea chu Europa Conference League a khelhpui a, Villa tan Europa League a champion bawk. Blues-a loan-a a khelh lai khan, London club hian a ngheta lakluh theihna dan an nei a, mahse, Blues hian pound maktaduai nga chawi a, a ngheta lakluh loh an thlang zawk!

Sancho hi a kum a la tlem avangin insiamṭha turin hun a la ngah a, tun hnaiah social media lamah a training lai video a tarlang nasa hle - club thar zawnna chi khat a tan a hmang niin a lang.

Getafe hian Real Madrid-in an chhuah zalen tak, Spanish fullback Dani Carvajal pawh tun hnaiah khan free transfer-in an la lut tawh a, Sancho lam an hawi leh ta.