Dembele-a'n chawlh dil leh a tum?

Paris Saint-Germain forward Ousmane Dembele chuan Manchester City an hneh zawh hnuah, an coach Luis Enrique hnenah chawlh a dil leh mai thei tih fiamthuin a sawi.

October 11, Pathianni zana PSG-in Le Mans an mikhual ṭumin Spanish coach hian Dembele leh Nuno Mendes te chu chawlh a pe a, Man City leh Barcelona laka chhawr a duh vang nia sawi a awm.

League match khat an chawlh hnuah Dembele ropui takin a rawn kir a, City lakah goal khungin assist a nei bawk. Hei vang hian French forward chuan chawlh dil leh a tum thu fiamthuin a sawi.

PSG hian tun season-ah bul an ṭan ṭha tawk lo a, league match hmasa pathum aṭangin point hnih chiah an hmu a, Enrique-a dinhmun a nghing hman hial. Mahse Champions League champion lai team an insiam ṭha tawh a, team hlauhawm an ni leh tawh.

Kum 29 mi Dembele pawhin season tir lamah beisei pha lo mah se goal thum khungin assist pahnih a nei leh tawh a, Ballon d'Or kawl mektu a nih chhan a tilang leh ṭan tawh.

Zanin dar 8:45 hian PSG hian Strasbourg an lenchilh dawn a, October 20, Thawhlehni zanah Barca an hmachhawn leh nghal dawn avangin inrintawkna nei turin Strasbourg an hneh a pawimawh dawn.