Lalmalsawma Memorial Futsal Vawiin aṭangin khelh ṭan a ni dawn ta

Team 128 telna Lalmalsawma Memorial Futsal MFA Inter Village Futsal Tournament 2020 chu vawiin aṭangin Malsawma's Yard, Leitan-ah khelh ṭan a ni dawn. Match hmasa ber hi chhun dar 12:00-a khelh ṭan tur a ni a, Zuangtui LC leh Chhinga Veng LC A te aninkhel ang. 

February 15, Inrinni khan MFA chuan Inter Village bakah Season Ending leh MFA Futsal Season 3 atana inbuatsaihna atan Malsawma's Yard-ah FIFA/AFC/AIFF Futsal Referee Training an buatsaih a, mi 20 an tel.

Training hi Lalbiakdika Ngente (Bungkawn), VL Rinpuia (Durtlang Leitan), Laldinsanga (Bawngkawn) leh C. Zirliana (Bethlehem) ten an pe. Lalbiakdika, VL Rinpuia leh Laldinsanga te hian nikum July thla khan AIFF buatsaih Futsal Refereeing Course chu Gwalior, Madhya Pradesh-ah an chhim tawh a, C. Zirliana hi MFA Referee Committee leh MFA Match Commissioner a ni thung.

Futsal Referee Training-ah hian FIFA Futsal Laws of the Game chu theory leh practical-a zir a ni a, hun remchangah training hi video hmanga neih leh tum a ni.

Inter Village Futsal Tournament first round-ah hian match 64 a awm dawn a, vawiin hian match li chauh a awm ang a, February 22, Inrinniah second round lut tur a hriat kim ang. Round of 64 hi February 24-26 chhunga khelh tur a ni a, third round hi March 3-4 ah khelh a ni dawn. Serchhip-ah KṬP General Conference neih a nih dawn avangin February 27 leh March 1 inkarah inkhel a awm lo ang.

Champion team hian Rs 70,000 an dawng ang a, pahnihnain Rs 40,000 dawngin semi finalist-ten Rs 10,000 ve ve an dawng dawn. Best Player leh Top Scorer thlan a ni dawn a, Top Scorer hi Round of 16 aṭanga chhiar ṭan tur a ni. MFA hnuaia futsal-ah FIFA Futsal Laws of the Game hman a ni ang a, ball hman tur hi Nivia Simbolo Aviator a ni ang.