Middleweight-ah Samuel Zadeng a ṭha ber

LPS Pro Fight middleweight inhnekah feet ruk leh inches khata sang Samuel Zadeng chuan F. Lalthanliana Junior a hmachhawn a, champion lai Thanliana'n amah aia sang zawk beih a harsat. Bawngkawn West rawlthar Samuel hi a tir aṭanga tawp thlengin a chungnung zawk a, unanimous decision hmangin a chak.

Kum 19 mi Samuel-a hnek thui zawng hi 6ft 3in zet a ni a, round tawp thlengin Thanliana a awp bet hneh a, Lunglei Electric Veng boxer Thanliana kawnghren kawl lai a chhuhsak. Samuel-a hi NTP Boxing-ah training a nei a, hun rei tak boxing lo tuichilh tawhin Pro Fight a tel châk ṭhin thu leh champion nghal theih a inrin thu Vanglaini a lo hrilh tawh a, a rin dan ang ngeiin a champion nghal.

Bawngkawn West rawlthar Samuel-a hian a champion-na kalkawngah welterweight-a lo champion tawh Lalruatzela Hauzel a hneh a, Pro Fight-a a vawi khat inlannaah tawnhriat ngah ang maiin a khel a hmuhnawm a, pumraw ṭha tak a neih bakah a la naupang avangin a hmabak a êng hle.

Pro Fight middleweight-ah Samuel-a hi champion thei parukna chiah a ni a, kum 2017 hnuah middleweight-ah title humhim thei an awm lo chhunzawm zel a, Pro Fight neih leh hmasa berah a kawnghren humhim a tum ve thung dawn.