Flyweight-ah Enkawla a champion

LPS Pro Fight flyweight title fight-ah vawi hnih a vanduai zawka lo ṭang tawh Vanlalenkawltira a inlan a, kum 2024-a a lo hneh tawh loh Lalringngheta nen an inhmachhawn avangin mipui ngaihven a hlawh nghal.

Tuipui boxer a hmachhawn vawi hnihnaah Enkawla'n vanduai nawn a tum tawh lo a, a tir aṭangin fimkhur takin a khel. Kulikawn boxer hian a beidawn duh loh rah a hmu a, a tawpah unanimous decision hmanga chakin Rinngheta kawnghren a chhuhsak.

Enkawla hian 2024 Pro Fight a chak loh hnuah a beidawng mai lo a, TD Boxing Academy-ah training neiin kumin August khan Thailand-ah Oriental and Pacific Boxing Federation, OPBF, silver title chuhin a inhnek.

Thailand-ah Enkawla hian Japanese boxer Hayate Hanada hneh lo mah se hma a sawn tih Pro Fight-ah a hmuh theih a, ram pawna a inhnek chuan inrintawkna a pek thu Vanglaini a lo hrilh tawh. Beidawng duh loa rim taka a inbuatsaih avangin Enkawla hi Pro Fight vawi 12 neih tawhah, lightfly/fly-a champion thei mi hrang pasarihna a ni zui a ni.