Welterweight-ah Zira'n Ramfela a hneh

Pro Fight-a a vawi khat telnaah Lalnunzira a champion nghal a, title fight-ah tawnhriat ngah HC Lalramfela a hneh avangin a tan hnehna ropui bik a ni. Zira hian Lallawmawma kawnghren kalsan tak rochung turin Ramfela hi split decision-in a hneh.

Round tir lamah Ramfela a chungnung zawk a, mipui tam tak thlirna hnuaiah Venghlui boxer a zam lo. Chutihrualin Zira a insiamṭha ve nghal a, Haulawng boxer hian round hnihna aṭangin awmze neiin a bei let a, a kut ding lam a hmang thiam hle.

Round li an inhnek hnuah kum 31 mi Ramfela a vanduai ta zawk a, weight hrang pathuma champion hmasa ber nih a tumna a hlawhtling ta lo. Kum 2014 aṭangin Ramfela hian awl nei miah loin Pro Fight-ah a inlan a, 2015 bantamweight leh 2023 lightweight-ah a champion.

Inhnek zawhah Ramfela'n thlahna thu a sawi a, Pro fight-ah inlan tum tawh lo mah se a hming theihnghilh theih a ni tawh dawn lo. Ramfela hian Haier Best Challenger lawmman a dawng zui bawk.

Hetihlai hian Zira erawh a hmabak a eng takzet a, title a chuhna kawngah hian Venghlui boxer beiseiawm Zoremsanga a hneh bawk a, champion tura mipui rinkai ber ni nghal lo mah se round a sangah a tlo zia a lantir a, phu takin a champion a ni.