Bantamweight-ah Joseph elpha an awm lo

LPS Pro Fight bantamweight-ah Laldinsanga kawnghren kalsan tak inchuh turin boxer tam takin hming an ziak lut a, a tawpa a changtu chu nikum December thlaa MIZBA buatsaih Mega Boxing champion L Joseph Buihringpachha a ni. Siaha boxer hi Pro Fight a vawi khat telna niin bantamweight-ah a champion nghal.

Sete Boxing Academy-a inzir Joseph hian final-ah Mega Boxing final-a a lo hmachhawn tawh Rambuatsaiha a hmachhawn nawn. Siaha boxer Joseph hi chungnung nghalin round khatnaah Buatsaiha chu 'count' ngai khawpin a hnek tlu nghal a, boruak sangah a zam lo hle.

Round hnihnaah Ramthar North rawlthar Buatsaiha'n hma a sawn hretin insiamṭha mah se Joseph-a a inthlahdah duh bik lo. Joseph hian knockout thei lo mah se round zawng zawng la vekin unanimous decision-in hnehna a chang.

Kum 17 mi Joseph-a hian round dangah pawh a thiamna a lo lantir tawh a, Pro Fight a vawi khat khelhna ni mah se naupang a nih lai aṭangin boxing a khel tawh a, title chuh tur zawn zana hmeichhe exhibition match khel Vanlalduatsangi unaupa a ni bawk.

Siaha rawlthar Joseph hian kuminah champion turin theihna a neih tih a lo lantir tawh a, boxer ṭha tak tak lo hneh tawhin an zingah tawnhriat ngah tak tak pawh an tel. A la naupan bakah inelna a hman ṭhat avangin 'Haier Promising Boxer' chawimawina pek a ni.