Chelsea chak zanah lawm a kim lo

Bournemouth laka 5-1 ngawta an chak hnuah Chelsea an chak chhunzawm a, Blues hian Inrinni zan Premier League inkhelah Everton chu 2-0 in an hneh - Pedro Neto chuan goal hnih a khing.

Chelsea-in league match hnih a zawnin hnehna an chang ve leh ta a, mahse, an lawm erawh a kim lo. London club keeper Emi Martinez chu hliam vangin lakchhuah a ngai a, a chawlh chen tur chiang taka sawi awm lo mah se, a lo berah match thum vel chu a khel thei dawn lo niin an sawi.

Hill Dickinson Stadium-a inkhelah Blues hian goal an khung lawk lo a, an goal hmasa ber hmu turin minute 46-na an nghah thlen a ngai - Pedro Neto chuan goal hmahruai a khung a, minute 90-naah Jordan Henderson-a freekick pet aṭanga ball per chu goal-ah a chantir leh bawk.

Chelsea boss Xabi Alonso-a'n a vawi hnih nan midfield-ah Moises Caicedo leh Henderson a inkawptir a, Cherries laka an khelh dan ang thoin midfielder pahnih an nghet ṭha a, Chelsea midfield phui lo ṭhin a zia ta hle.

Caicedo hian goal khung theihna remchang a nei a, mahse, uiawm takin post a tihper. Blues tan Cole Palmer pawh a hmuhnawm viau a, mahse, a pawimawh ber goal a khung thei bik lo.

A tawpah chuan thla kua hnua a vawi khat nan Premier League-ah Chelsea-in clean sheet an nei a, match 22 zet a zawna goal an lo chhuah tawh chu an titawp ta - Chelsea tan thawk huaina tham a ni.

Hetihlai hian Martinez thlak a ngaih avangin, Chelsea clean sheet hi keeper pahnih thawhchhuah a tih theih - kum 21 mi Mike Penders chuan Martinez hi a thlak a, EPL-a a match khelh hmasak ber a ni.

Kum 2024-a pound maktaduai 17-a Blues pantu hian Martinez awm loh hlanin si ban a nghah a ngai dawn a, Premier League-ah Tottenham Hotspur leh Manchester United hmachhawnin, League Cup-ah Liverpool hmachhawn a ngai dawn - Blues tan fiahna a inṭan dawn!

Alonso chuan, "Mike hi mahni inringtawk tak a ni a, a huaisen a, a chungah rinna kan nghat tlat - khelmual a luh hnuah a tiṭha hle a ni," tiin a keeper hi a fak.

Hetihlai hian hliam vanga lakchhuah, damdawi ina zai zui tak Martinez chuan, "Min ngaihtuahna avangin ka lawm a, hlawhtling takin min zai e. A pawimawh ber chu hnehna kan chang a, goal kan chhuah lo bawk kha a ni," tiin a sawi.