Favang Tournament-ah Zarkawt an champion

Mizoram Basketball Association (MBBA) buatsaih Favang Tournament final chu Zirtawpni zan khan khelh a ni a, Zarkawt BCA chuan 76-63 in Zemabawk Basketball Club hnehin an champion.

D League club inkhelah Chawnpui Basketball Club chuan 81-73 a Chhinga veng Basketball Club hnehin an champion a, hmeichhia-ah Bungkawn LB Associates an champion bawk.

BCA nge nge

Final-ah BCA-in bul an ṭan ṭha tawk lo a, first quarter-ah Zemabawkin hma an hruai a, Mizoram Super League season hnuhnung ber semifinal-a an hneh loh club lakah Zarkawt an tlawm leh dawnin a lang hman.

Mahse muangchangin BCA an insiamṭha a, 40-39 in Zemabawk hmahruaina an chhuhsak a, point khata tam zawk chunga chawlhlawk hmangin an hawi kir leh tawh lo.

Zarkawt club hian an point guard chhuanvawr Zonunsanga chhawr thei lo mah se a hmun ruak hnawhkhattu Lalhminsanga a awm a, Sangsanga leh K. Lalhmachhuana te inkawp an hlauhawm hle.

Anni pahnih bakah hian veteran player Lalrina Renthlei a lo kir a, MSL 10-a a inhliam hnua inelna a hmachhawn leh hmasak berah BCA tan innghahna tlak a la nihzia a pholang.

ZBBC lamin Lalhnehpuia leh Ruatkima te hmangin BCA nen an inkar pawt zim mah se, BCA tan defence-ah Michael Liansanga leh Matthew Remtluanga Sailo te an ngam lo. League round leh semifinal-a che ṭha tak Lalrinchhana a langsar thei lo a, Kulikawn rawlthar Rinchhana hi BCA player ten an dah ṭha hneh hle.

Zemabawk basket a tan laiin BCA an inthlahdah ve lo a, third quarter hnuah kawng engkimah Zemabawk aiin an ṭha zawk a, hun tawp thlenga chungnung zawkin an champion.

Engtin zel?

BCA hian kumin Favang tournament-ah inhliam vangin Zonuna an chhawr thei lo a, snooker a khelh avangin Lalrina a inlan kim thei lo bawk. Mahse, an coach Vanlalhruaitluanga'n a player neih ang ang a hmang thiam a, League round aṭanga final thlengin a chakpui fai vek.

Chutihrualin Zemabawk an duai bik lo a, C. Vanengmawia naute hi final-ah chiah an chak lo. Defence lama player pawimawh ṭhin Lalrinzuala inhliam an tuar tih a lang a, boruak sangah Rinchhana a la rintlak tawk lo bawk a, nomawi chawi turin an la nghah a ngai.

D League

D League final-ah a tir aṭangin team pahnihte an inngam nghal a, MSL lo khelh tawh pahnih hian hma inhruai chhawk zak zakin an inhlau lo tawn hle. Mahse, second quarter tawp lamah Chawnpuiin an inthlauhna an tizau ṭan a, Chhinga Vengin hma an hruai leh tawh lo.

Chawnpui tan RVL Lalhriatrenga leh Lallianmawia te chu an innghahna a ni a, MSL club hrang hrang tana lo khel pahnih hi Chawnpui BC tan an hlu hle. Chhinga Veng erawh a hmawr an bawk fuh lo a, an khelh ṭhat loh ṭum an tawn avangin an result a lungawi bak tih theih an nei lo.