Bengaluru-in Chennaiyin an hneh

Inrinni zan Indian Super League inkhelah Bengaluru chuan 2-0 in Chennaiyin an hneh a, Ryan Williams leh Mihailo Perović ten goal khat ve ve an khung - mikhual Chennaiyin hian a chhanletna tur an nei lo.

Bengaluru tan Lalremtluanga Fanai chuan inkhel bul ṭanin, minute 90 a khel tluan a, Tluangtea khelhna Bangalore club tan league match hnih an khelhna chiah niin, an la chak ve ve.

Chennaiyin tan Ayush Chhetri leh C. Lalhriatpuia ten inkhel bul an ṭan ve ve a, mahse, Mizoram midfielder ṭha pahnih hian an club an chakpui thei lo - defender PC Laldinpuia chu bench aṭangin a lut bawk.

Hetihrual hian Chennai club hi league match hnih an khelh tawhah an la chak zo lo ve ve thung a, Bengaluru laka an tlawm hma hian FC Goa chu 1-1 in an lo inhnehtawkpui tawh - an tum leh hmasak ber tur chu Mohun Bagan an ni!

Inrinni zan inkhel dangah Inter Kashi-in Odisha an mikhual a, mahse, chak zawk an awm lo - team pahnih hi 1-1 in an inhnehtawk a, league match hnih an khelh tawhah club pahnih tan point an hlawhchhuah hmasa ber ve ve a ni.

Odisha hian goal an khung hmasa zawk. Minute 56-naa K. Lalṭhathanga freekick aṭanga ball kal chu Stephen Eze chuan tauhin, Inter Kashi player Pratik Choudhari a per a, a goal daih!

Inter Kashi tan Thoi Singh chuan minute 89-naah a khung ve leh a, hun tawp thlenga goal dang lut tawh loin team pahnih an inhnehtawk - Inter Kashi tan Laldinliana Renthlei chuan inkhel bul a ṭan.

Odisha tan Puitea bakah Vanlalzuidika Chhakchhuak chuan bul a ṭan a, bench aṭangin K. Lalrinfela (Mafela) a lut bawk.

Zanin dar 7:30-ah Mizo player kawl lo Punjab FC chuan Mumbai City an mikhual dawn a, Mumbai club hian Lallianzuala Chhangte nei tawh lo mah se, Hmingthanmawia Ralte (valpuia), B. Lalnuntluanga leh Zothanpuia an kawl mek.