City-in ngamtu la tawng lo

Manchester City-in Premier League lama an result neih ṭhat an chhawm nung zel a, Inrinni zan khan an mikhual Ipswich Town chu 3-2 in an hneh - Manchester khaw club hi league match sarih an khelh tawhah an la chak vek a, EPL-a an match hmasa pasariha an chak vekna hmasa ber a ni!

City tan Phil Foden chuan minute 19-naah goal hmahruai khungin, mikhual Ipswich hian Daizen Maeda hmangin minute 21-naah si phurh an sut a, Etihad Stadium-a City fan-te a barakhaih.

Mahse, Manchester khaw club tan Haaland a inlar a, goal khung bansan thei lo striker hian minute 34-naah an hmahruai nawnna goal khungin, 2-1 in chawlhlawk an hmang.

Haaland hian minute 69-naah a belhchhah leh a, chak tur a chiang tawh, tiin a sawi theih. Minute 90-naah Zian Flemming chuan penalty aṭangin goal khat khung ve leh mah se, awmzia a nei phak tawh lo a, 3-2 in City an chak ta tho.

City-in kum 129 chhunga an league match hmasa pasariha hnehna an chan leh hmasa ber a ni a, 1897-98 season khan hetiang hian an lo ti tawh. Mahse, khatih lai khan second division club an ni thung!

Pep Guardiola hmun ruak hnawh khah harsat turzia mi tam takin an sawi a, chutiang karah chuan Enzo Maresca-a'n Pep-a meuh pawhin a tih theih loh a ti a, EPL table chung ber an luah mek bawk.

Premier League club zingah Chelsea chuan 2005-06 season khan an league match hmasa pakuaah hnehna an lo chang tawh a, Liverpool chuan 2019-20 season khan an match hmasa pariatah hnehna an lo chang tawh bawk - EPL-a league match hmasa pasarih chak thei zingah City an tel ve ta chiah a, Chelsea leh Liverpool hi an champion zui ve ve tih theihnghilh lo la.

Hetihrual hian City hi EPL pawn lamah an ropui lo - Champions League-a an match hnuhnung zawkah Paris St-Germain chu 4-2 in an ngam lo a, Thawhlehni zanah AEK Athens an mikhual leh zui ang.

City tan Ipswich an mikhual hi thubuai 115 an neiha 114-a thiam loh an chan hnu a, an khelmuala EPL match an khelh hmasak ber a ni a, fan-ten nasa takin EPL hlapui an au el, 'City' tiin an au rual nasa hle.

Maresca chuan, "Stadium boruak a ṭha a, fans, club leh player te kan zinkawngah hian kan tel vek a ni," a ti - a hmunah mipui 60,817 in inkhel hi an en a, Etihad Stadium-a inkhel en an tam ber ṭum a ni.