Barca dang thei an awm lo

La Liga-ah champion lai Barcelona dang thei an awm lo a, Inrinni zan khan khualmualah Real Betis chu 5-2 in an hneh a, hmahruaitu nih chhunzawm zelin tun season-ah hneh theitu an la tawng lo.

Barca tan Lamine Yamal, Rodri, Gabriel Jesus, Eric Garcia leh Dani Olmo ten goal khat ṭheuh an khung a, Betis tan Valentin Gomez leh Abde Ezzalzouli te goal khung chu scoreline timawitu chauh a ni.

Estadio de La Cartuja-a inkhelah Yamal-a'n minute 10-na lekah mawi zetin an hmahruaina goal a khung a, tun season-a a goal riatna chiah a ni. Mahse, a chhunzawm tu erawh Betis goal a ni thung.

Corner aṭanga ball kal zel chu Gomez-a'n hnai tak aṭangin a tauh lut a, an si phurh sutna goal a khung. Barca-in goal dang an khung thei mai lo a, mahse first half tawp hma hretin Rodri-a'n a team hmahruai nawnna goal a tauh lut.

Second half-ah Jesus-a'n Yamal-a siamsak chu goal ruakah a khung a, an hmahruaina a belhchhah. Mahse minute hnih hnu lawkah Abde-a'n chhang let ve nghalin an si phurh a sut ṭhen a, an mikhual lehthal turin beiseina an nei sang hman hle.

Betis hlim chhung erawh a rei lo a, minute khat hnu lawkah Facundo Bernal chu Yamal a tauh avangin hnawhchhuah a ni a, kim loa khel chungin Barca lehthal ngaihna a awm tawh lo.

Red card an hmuh hnuah Betis an bet a, Barca tan Garcia leh Olmo ten goal khat ve ve khung belhin, Hansi Flick-a nauten khualmuala hnehna chang turin harsatna an tawk lo.

Barca hian hnehna an chan bakah chanchin lawmawm dang an nei a, Raphinha a inkhel leh thei tawh. Brazilian forward hian minute 69-naah Yamal a thlak a, mual chhungah danglamna siam lo mah se an goal khung khawl a lo kir avangin tlarhma an hriam leh sawt ang.