Liverpool ropui 'lai' chelhtu Man City

Premier League nomawi inchuh boruak a nung thar leh ta. Ningani zan khan Manchester City chuan an mikhual Liverpool 2-1 in an hneh a, hmahruaitu Reds nena an inthlauhna chu point li chiah a ni ta.

City tan Sergio Aguero hmahruaina goal chu Liverpool tan Roberto Firmino-a'n khung mah se mualneitu tan Leroy Sane-a'n chakna goal a khung.

Premier League match 20 chhung tlawm tawh lo Liverpool an tlawm ve ta a, City chauh an lawm lo–an elpui Tottenham Hotspur, Chelsea leh Arsenal bakah an hmelma kumhlun Manchester United ten City lawmthu hrilh an châk khawp ang!

City manager Pep Guardiola pawhin anmahni mai ni lo club dang tan kawng an hawng tel tih a pawm a, Spanish manager chuan, "Jurgen Klopp tan chuan a pawmawm kher lo ang a, mahse zanin result hi Premier League tan a lawmawm a ni," a ti.

Pep Guardiola-a'n Etihad Stadium-a Liverpool an mikhual hmain point thum aia hniam an tum loh thu a sawi a, mualneitu team hian inkhel pawh an thunun nghal.

Mahse, chance hlauhawm nei hmasa zawk erawh Liverpool an ni. Sadio Mane chuan ṭha taka ball a um luh hnuin post a pet per a, a let lehlam hi John Stones chuan pet chhuah a tumna lamah Ederson a pet per a, an goal lamah a let.

Liverpool fan-ten ball per hi goal-ah a lut hmanah ngai mah se goalline technology hmangin ennawn a ni a, danah goal-a pawm tur chuan ball pumpuiin line-a pelh a ngai–mahse ball hian 1.12cm-in line a pel kim lo a, goal-ah an pawm lo!

Minute 40-naah City zawkin goal an khung ta nge nge–Aguero chuan Dejan Lovren-a ven karah tawih zetin a pet goal–a career-a league goal 250 a khungna chiah a ni. Argentine striker class sanna sawi hmaih thiang lo mah se Lovren-a'n a hna a thawk tawk loah a ngaih theih.

Goal dang lut loin chawlhlawk hman a ni a, Klopp-a'n khel ṭha lo James Milner la chhuakin Fabinho a luhtir a, Brazilian midfielder a luh hnuah Liverpool an khel ṭha sawt.

Minute 64-naah Liverpool-in goal an thawk chhuak ta nge nge a, full back ṭha pahnih thawhrah a ni–Trent Alexander-Arnold chuan penalty area-ah Andy Robertson tan ball a thlawh lut a, Scottish defender hian Firmino tan siamsakin Brazilian striker hian a tauh lut.

Liverpool an phur sawt a, City an hneh chuan point sawm ngawtin an elpui hi an tlansan thei tih hriain an goal nawr pawh a na sawt–mahse, City-in tlarhma an neih ṭhat ve tho avangin counter attack an dawl zo lo.

City-in chak takin Raheem Sterling hmangin an nawr let a, Liverpool forward hian vengtu nei lo Leroy Sane tan a siamsak a, German forward hian goal kil sir takah a pet lut–Liverpool-in a chhanletna tur an nei lo a, tun season-a a vawi khat nan an tlawm.

Liverpool boss Jurgen Klopp-a'n Jordan Henderson, James Milner leh Georginio Wijnaldum-te midfield-ah a chhawr a, thiamna aiah tharum hmangin City midfield dan chah a tum niin a lang.

Mahse, Klopp-a ruahmanna a hlawhchham a, chumi tichiangtu chu Milner thlaka Fabinho a luh hnua an inkhel hmelhmang a danglam kha a ni. Klopp hian substitution siam kawngah pawh a ti fuh lo.

Khel ṭha lo Wijnaldum a lakchhuah mai rin a nih laiin Mane a la chhuak a, Senegalese forward aiah hian Xherdan Shaqiri a luhtir a, minute 86-a Wijnaldum la chhuaka Daniel Sturridge a luhtir meuh chuan a tlai tawh.

City tan erawh Fernandinho chuan player ṭha tak a nihzia pholangin midfield-ah roreltu a ni a, Liverpool goal nawr na lutuk tur vawi tam chhu chattu a ni–mual sira khel pahnih Sterling leh Sane thiamzia sawi hmaih rual a ni lo.

City-in Liverpool an hneh a, Pep-a'n Reds hi ngam lo ngat se chuan an tan nomawi beiseina a bo tawh tur thu a pha lo.

Barcelona boss hlui chuan, "Hnehna kan chan chuan nomawi kan beisei leh thei ang a, kan chak lo a nih erawh chuan kan tan engkim a tawp tawh ang tih kan chiang a ni," a ti.

Pep chuan Premier League hautak zia sawi zawmin, "Hetiang taka league harsa hi ka la hre ngai lo. Champion beisei ngam team an awm nual a, match khelh tur zawng zawng hi final a ni vek tawh a ni.

"Liverpool hi hmahruaitu an la ni reng a, mahse kan inthlauhna erawh kan sawr zim a ni. Tottenham hian an khelh dan avangin zah an phu a, United-in ngai an awh ṭan a, Chelsea leh Arsenal lah manager thar nei an ni," tiin elpui an la ngah thu a sawi.