Forest laka Arsenal chakna Noni Madueke

Premier League-ah champion lai Arsenal-in Pathianni zan khan Noni Mandueke goal hmangin Nottingham Forest 1-0 in an hneh. Gunners hian match sarih aṭangin point 18 an hmu a, point thum chauhin hmahruaitu Manchester City an pha lo. Mikel Arteta hote hian October 21, Nilaini zan hian Bayern Munich an hmachhawn ang.

Arsenal hi international break hmain Brighton & Hove Albion lakah an mualpho a, kar hnih ṭha an chawlh hnuah champion zia an lantir leh tawh. Gunners hian Forest an hneh hma hian Leeds leh Lille (UCL) te hmachhawnin an hneh ve ve.

Pathianni zanah Arsenal-in goal an khung lawk lo. Chutihrualin mual dinglamah Madueke a nung ṭha a, Bukayo Saka a hmuhnawm bawk a, goal chance ṭha bik erawh an insiam thei lo. Gunners hian first half-ah inkhel an thunun a, chutihrualin counter attack-ah Forest an hlauhawm ve reng.

Referee-in halftime hamrik an ham a, Arteta-a'n minute 15 chhung ṭha taka hmang turin dressing room lamah a tlan lut nghal. Spanish manager hian an goal bawh a na tawk lo tih hriain Madueke chu Eberechi Eze aiah a luhtir nghal.

Forest zawkin Arsenal tlarhnung an rum ṭhaih hmasa zawk a, mualneitu lam hian tlarhnungah bus an park tlat avangin Arteta hoten ṭhiah an harsa hle. Mualneitu manager Oliver Glasner-a'n hna a thawk ṭha a, set piece-ah pawh Gunners player-te an veng ṭha hle.

Arsenal-in goal an khung lawk loh avangin minute 66-naah Viktor Gyokeres, Mikel Merino leh Jurrien Timber te luhbelh tir an ni a, goal hmuh tur erawh a awm nghal lo. Forest lamin counter attack hmang bakin Arsenal an nawr duh lo a, tlarhnung a phui ṭha hle.

Declan Rice-a'n goal khungna remchang a nei a, English midfielder hian Timber-a hnathawh ṭhat chu engmah loah a chantir. Minute 80-naah Madueke-a'n mual vei lamah ball a chang a, huai taka box chhungah la lutin kawh zetin a pet goal. Arsenal-in Madueke an lakluh khan Gunners ṭantu lawm a kim lo a, mah se Arteta-a'n a hmang thiam miau a, London club-ah rinrawl ni lo mah se team tichaktu zinga mi a ni.

Forest an bet reng ta bik lo a, siphurh sut tumin an nawr ngam ta a, Arsenal tlarhnung ṭum hnih an ṭhiat. An chance ṭha neih hmasak Liam Delap-a'n engmah loah a chantir a, injury time-ah Murillo-a'n ṭha zetin lalut mah se goal zawnah a pet lo. Mualneitu hian David Raya tan hna an siam pha lo a, Arsenal-in 1-0 in hnehna an chang.

Arsenal-in game hmuhnawm ber an khel lo a, mah se ball an chang tam a, hnehna an chang. Season liam ta pawh khan Arteta-a'n attacking football khelh aiin result neih a thlang a, a tisual lo. Tun season-ah pawh Gunners-in khelh dan nghet ṭha tak an nei a, goal khung aiin goal venhim an ngai pawimawh a, Community Shield chhiar telin inelna hrang hrangah match sarih an clean sheet tawh.

Forest an hneh zawhah Arteta chuan, "Forest kha coach ṭha enkawl a ni a, an tlarhnung ṭhiah a harsa hle. Rilru lamah inpeih a ṭul a, engtik lai pawhin chak duhna kan nei reng a, goal ṭha bikin danglamna a siam," tiin inkhel chungchang a sawi.

Team chungchang sawi zuiin Arteta chuan, "Kan squad a chhah ṭha tawk a, player hi kan inthlak ve reng a ṭul. A ṭhen chu ni thum liam ta khan bul an ṭan ang a, a ṭhen chu kan inkhelh leh hunah bul an ṭan ang. Minute 60 khel turte an awm ang a, minute 45 khel turte leh minute hnih chauh khel turte an awm dawn. Chuvangin mamawh huna lut turin an inpeih reng a ṭul a ni," tiin a sawi.

Arsenal hian Champions League-ah Bundesliga champion lai leh tunlai team ṭha ber zinga mi Bayern Munich an hmachhawn dawn a, German club hian English striker Harry Kane an nei a, London club tlarhnung fiahin a awm ang.