MPL13 semifinal zanah vek khelh a ni dawn

Star Cement MPL13 semifinal chu October 22, Ningani aṭangin khelh ṭan a ni dawn a, first leg leh second leg awmin zan dar 7:30-ah vek khelh a ni dawn. Mizoram chhunga inelna sang ber knockout stage hi RG Stadium-ah khelh a ni dawn a, a hmuna kal hman lo tan Zonet Zawlbuk leh YouTube channel aṭangin a en theih bawk ang.

MPL champion lai Chanmari FC-in kai thar Ramthar Veng FC an hmachhawn dawn. League round-a pakhatna Aizawl FC an inhnuhdawh avangin Chanmarians hi champion tura rinkai an ni a, MPL kai thar Ramthar Veng FC hi 'dark horse' a tih theih thung ang. Ramthar Veng tan a hunah tak MS Dawngliana a rawn kir a, Bawngkawn tlangval hi a club hlui Chanmari tan hnawksak a tling thei dawn.

Semifinal hnuhnung zawkah Mizoram Police FC leh Dinthar FC te an inkhel dawn a, team intiat tawk tak an nih avangin a hmuhnawm dawn. Police hi indinthar chho leh mek an ni a, Maimawms lam pawhin season liam taa MPL-a an kir hnuah team nghet zawk an rawn din ta bawk. Table-ah Police hi a chung zawkah awm mah se chak zawk tura dah a rem lo ang.