Lawm lohna karah Klopp thla a muang

Manchester City captain Vincent Kompany-a'n hlauhawm takin Mohamed Salah a tlawh thlu a, Reds manager Jurgen Klopp chuan Belgian defender-in red card a hmu lo chu mak a tih thu a sawi.

Klopp chuan, "Vincent Kompany hi ka duhzawng tak a ni a, ka hriatthiam loh erawh red card a hmu lo kha a ni. Salah khan Kompany chauh hmachhawn tur a nei tawh a, Mo-a va tlawh kha a tum ang takin tlawh fuh se chuan season tluanin a chawlh a ngai ang," a ti a, a lawm lo hle.

Belgium international Kompany erawhin Klopp-a thusawi a ṭawmpui ve lo. "Challenge ṭha takah ka lo ngai mai a, ball ka chhuhsak a, Salah kha chu ka tawk fuh ve hlek mai chauh a ni," a ti.

Klopp chuan inkhel thlirkirin, "Kha aia khel ṭha thei kha kan ni a, a hmawr kan bawk ṭha tawk lo ṭhin. City aiin kan vannei lo zawk bawk," tiin a sawi.

Liverpool tan Mane-a'n post a pet per bakah Salah chuan hun tawp lamah chance duhawm tak a nei bawk a, City tana Aguero leh David Silva ten hun ṭha an nei ve tho bawk.

Hma an la hruai miau avangin Klopp erawh a lunghnur lutuk lo. German coach chuan, "Season ṭantir khan City vawi hnih kan tum hnuah point lia kan la san cheu tur thu sawi se, chu dinhmun chu sumin ka lei duh hial ang.

"A ṭha thei ang bera season khar kan duh a, kan dinhmun a la ṭha em em a ni. Zan duhawm tia sawi tur a ni lo a, mahse kan buaina tur ber erawh a ni lo," tiin a thla a la muang rih hle.