Iraola nen kan inmil - Barcola

Liverpool forward Bradley Barcola chuan an coach Andoni Iraola game duh dan leh a duh dan a inmil thu a sawi a, Merseyside club tana khelh nuam a tih thu a sawi chhuak.

Barcola chuan, "Liverpool ka zawm hma khan coach nen kan inbia a, wing-a khelh chhunzawm zel ka duh thu leh, ka tan chuan 'speed' a pawimawh thu ka sawi. Ani pawhin attacking football khelh nuam ka ti tih a hria a, chutihrual chuan tlarhnung ka ngaihthah ngai lo.

"Ani pawhin chutiang taka khel tura min beisei thu a sawi a, kan inbiakna kha a awlsam em em a ni," a ti a, Reds leh Paris St-Germain indawrna rei mah se, coach nen chuan awlsam taka an inbiak fel thu a sawi.

Barcola hian nipui transfer lai khan Liverpool hi PSG aṭangin pound maktaduai 123 ngawtin a zawm a, a tirah sawisel hlawh mah se, kar hmasa khan LASK lakah hattrick a siam a, Brentford lakah assist a nei leh bawk.

French forward chuan, "Ka khelh dan leh Iraola game thlir dan a inmil a, direct game khelh duh a ni a, kei pawh chutiang mi tho chu ka ni. Ani chuan min ringtawk a, tunah chuan khelmualah ka theihna ka pholan ve a hun - min rinna ka tihhlawhchham loh ka beisei," a ti.

Liverpool hian tun season-ah beisei an phak lo - league match sarih khelh tawhah vawi thum chiah an la chak a, Champions League-ah erawh match hnih khel tawhin, vawi hnih an chak tawh thung.

Merseyside club hian zanin dar 12:30-ah UCL match thumna khel turin Villarreal an mikhual a, a zawna a vawi thum nan Reds ṭantuten an chak an beisei ang.