Stuttgart hmachhawn lo tur Romero

Argentine defender Cristian Romero chu a malpuiah hliam a neih avangin kar a chawlh a ngai dawn a, zanin dar 12:30-ah Champions League khel tura Stuttgart an tlawh hunah a inlan ve thei dawn lo.

Kum 28 mi Romero hi Inrinni zana Espanyol an lenchilh ṭumin a inhliam a, minute 67-naah lak chhuah niin Rodrigo Mendoza-a'n a thlak. Romero hliam hi endik a nih hnuah serious lo mah se, a tlem berah kar khat tal chawlh a mamawh.

Tottenham Hotspur defender hlui hi awm lo mah se Marc Pubill leh David Hancko te an awm a, tawnhriat ngah José María Giménez bakah Clement Lenglet leh Robin Le Normand te an la neih avangin manganna tur a awm lo.

Atletico hian an captain Koke an chhawr thei dawn lo bawk a, Spanish midfielder lo kir hun tur hi a chiang lo thung. Chutihrualin damlohna avanga Espanyol laka inlan lo Johnny Cardoso chhawr theihin a awm bawk ang.

Stuttgart erawh Ermedin Demirovic-ah an innghat leh dawn a, Bosnia & Herzegovina forward hian tun season UCL-ah goal li khung tawhin Erling Haaland nen an khung zat a inang.

Kum 28 mi Demirovic hnungah hian World Cup khelh zawh taka Germany squad-a tel phâk Deniz Undav leh Jamie Leweling te an awm leh dawn a, Moroccan forward Bilal El Khannouss an neih bawk avangin Atletico barakhaih thei turin an ṭha tawk.