East Bengal tan Edmund

Pathianni zan khan East Bengal chuan tun season-a a vawi khat nan ISL match an khel a, ISL club thar Churchill Brothers chu 4-0 ngawtin an sawp - Mizo tlangval Edmund Lalrindika'n goal khat a khung a, 'player of the match' atan thlan zui a ni.

East Bengal tan Dani Ramirez chuan minute hnihna lekah goal hmahruai a khung a, Edmund hian minute 45-naah a belhchhah - Lunglei tlangval goal khung hi David Lalhlansanga siamsak a ni a, Kolkata club tan Mizo tlangval an vul.

Fatorda Stadium, Goa-a inkhelah Bipin Singh chuan goal hnih a khung ve bawk a, Goan club-in a chhanletna tur an nei lo - East Bengal tan Lalchungnunga'n inkhel bul a ṭan bawk.

Pathianni zan inkhel dangah NorthEast United chuan goal li an khung ve bawk a, mikhual Kerala Blasters chu 4-1 ngawtin an sawp - Highlander hian Mohun Bagan an lo hneh tawh bawk a, league match hnih an khelh tawhah an la chak ve ve tihna a ni.

NorthEast United tan striker chhuanvawr Alaaeddine Ajaraie chuan goal hnih khungin, Antonio Moyano leh Aman CK ten goal khat ve ve an khung a, Blasters tana Momo Yansané goal khungin awmzia a nei phak lo.

Highlander tan Mark Zothanpuia chu bench aṭangin a lut a, Blasters tan Freddy Lallawmawma'n inkhel bul a ṭan bawk. Nizanah Punjab leh Mumbai City inkhelin, an result kan hre hman lo a, Zirtawpni hma chuan ISL match dang a awm tawh rih lo ang.