Mbappe hoin Real Madrid an chak

Spanish club lian Real Madrid chuan Pathianni zan khan an mikhual Sevilla chu 4-1 in an hneh a, Nilaini zana RB Leipzig hmachhawn tur leh October 25, Pathianni zana El Clasico khel turin an inpeih tawh hle.

Real tan Kylian Mbappe-a'n goal hnih a khung a, Arda Guler leh Yan Diomande ten goal khat ve ve an thawh bawk. Sevilla tan Manu Bueno goal khung chu an mualpho lutuk tur hliahtu chauh a ni.

Inkhel chu

Santiago Bernabeu-a inkhelah mual neitu an hlauhawm nghal a, right back-a Jose Mourinho-a'n a chhawr Federico Valverde-a'n goal a khung nghal teuh hle.

Minute 30-naah Guler a inlar a, Diomande pass chu Turkish midfielder hian mawi takin keeper pet khumin an hmahruaina goal atan a khung a, 'goal of the season'-a thlan tlak a ni.

Los Blancos an phur laklawh a, minute sarih hnu lawkah Jude Bellingham-a 'back heel pass' chu Mbappe-a'n mawi taka a lak luh hnuah rang taka keeper a bum tlang lehin an hmahruaina a belhchhah.

Mikhual team-in first half tawp hma hretin an siphurh sut ṭhen theihna chance nei mah se, Thibaut Courtois an paltlang thei lo a, Real-in 2-0 a hmahruai chungin chawlhlawk an hmang.

Mbappe bawk

Second half-ah Mbappe bawk a langsar a, kum 27 mi forward hi minute 63-naah Sevilla defender Andrés Castrín-a'n a tihtluk avangin penalty a chawi a, Mbappe an dang thei lo. Paris St-Germain forward hluiin ama penalty hlawh chhuah a khung leh a, 3-0 in a team hma a hruaipui.

Sevilla-in Real defender te mutthluk hlanin goal an khung a, Bueno-a'n Real player ten an ven ṭhat tawk loh laiin goal kilah tak a khung a, Courtois tan dan theih a ni tawh lo.

Mahse Sevilla hlim chhung erawh a rei lo a, minute hnih hnu lawkah Diomande-a'n kawh zetin an chak nemnghehna goal a khung chhunzawm a, Real-in hnehna chang turin harsatna an tawk lo.

Engtin zel?

Mourinho naute hian an match hnuhnung pangaah goal thum khung tlin lohna match hnih chiah an nei a, mahse goal chhuah lohna match khat chiah an nei bawk. Champions League leh El Clasico khelh hmabak an nih avangin an tlarhnung tihphui an mamawh.

Hetihlai hian nikum April hnua a vawi khat nan Eder Militao a inlan a, Brazilian defender hian minute 85-naah Valverde a thlak. Real-in goal ven kawngah buaina an tawh laia Militao inkhel leh thei hi an tan chanchin lawmawm a tling.