Simmons a inhliam leh nghal

Ben Simmons chu Pathianni tlaia club practice an neihnaah a ke artui a tina a, tun season-ah Sacramento Kings-ah bul ṭan thar tum mah se season ṭan hma hauhin a chawlh a ngai nghal dawn.

Kum 30 mi Simmons hian 2024-25 season khan NBA-a a match hnuhnung ber a khel a, hemi season hian Brooklyn Nets leh LA Clippers tan a khel. Match 51 a inlanah minute 22 khel ziah ang a ni a, chawhrualin point nga leh assist 5.6 a nei bawk.

Season khat chhung a inkhelh tawh loh hnuah Kings-in an la lut a, kum khat atan dollar maktaduai thum leh a chanvea inremin Kings bakah Simmons a phur hle.

Mahse Australian point guard tan khua a var thei lo a, inhliam vangin a chawlh leh nghal a ngai. Simmons-a chawlh chen tur hi chiang taka la tarlan ni lo mah se thla 10 tal a nih a rinawm a, tun season pumin inkhel thei lo dinhmunah a ding.

Simmons chuan, "Ka nunah rilru leh taksa lama chona ka hmachhawn hnem tawh a, tal chhuah theih dan ka kawng ka nei ziah. Tuna ka hliam pawh hi ka inkhelh zinkawnga thil thleng pakhat ve mai a ni a, a tawpna tur a ni lo.

Basketball khelh loh hi ka tan chuan thil harsa tak a ni a, tun dinhmuna ding leh tura ka thil paltlang tawh ngaihtuahin a harsa lehzual. Mahse vanduaina aiin kan lo hmachhawn dan hian keimahni nihna a tilang chiang zawk a, chu chu ka thil zir chhuah a ni.

Hliamin vawi tam min lo tlakbuak tawh a, vanduaina tam tak ka lo tawk tawh bawk. Mahse ka tho chhuak leh thei ziah a, tunah pawh hian a danglam dawn lo," tiin instagram story-ah a post.

Kum 2016-a Philadelphia 76ers-in an draft hnuah Simmons hi NBA-a rawlthar hmuhnawm ber pawl a ni a, 'Rookie of the Year' pawh a lo dawng tawh. Mahse beisei a phâk lo zui a, Brooklyn Nets leh Los Angeles Clippers-ah te insawn leh mah se ngai a awh leh tawh lo.

A inkhelh hnuhnun ber chu nikum April daih tawh kha a ni a, inkhel loin awm rei tawh mah se club tam takin Simmons an iai lo. Club tam takin lak luh duh mah se Kings a zawm a, mahse inkhel turin a nghah leh rih a ngai dawn.