Vawiin tlai dar 2:00-ah Aizawl FC vs Indian Arrows
Aizawl FC chuan vawiin tlai dar 2:00 hian RG Stadium-ah India rawlthar ṭharual dah khawmna Indian Arrows an hmachhawn dawn.
Tun season I League-ah Aizawl FC che ṭha tawk lo mah se Mizoram Premier League nomawi an chawi hnuah team ṭha zawk an ni tih Gokulam Kerala hmaah an pholang. Gift Raikhan-a hote hian match 10 khelh tur an la nei a, table chunglama awm tur chuan Indian Arrows nen hian point thum hlawhchhuah ngei a ṭul ang.
Attacking Football
Aizawl FC-in Gokulam Kerala lakah goal thum an khung thei a, team nem zawka ngaih Indian Arrows lakah attacking football an khel chhunzawm ang.
Gift Raikhan tana chanchin duhawm loh chu Ansumana Kromah a dam chiang lo a, January 11-ah Real Kashmir an mikhual lehnghal dawn avangin Liberian forward hi an awm hahdamtir a rinawm.
Amaherawhchu Aizawl FC hian tlarhnung laiah Ugandan defender Juuko Richard Kassaga an chhawr thei dawn a, Kareem Omolaja-a'n hremna a hman zawh bawk avangin midfielder pahnih Alfred Kemah Jaryan leh Lalrinchhana ten zalen zawkin goal an nawr thei dawn.
Vanlalthanga leh C. Lalrosanga te awm hnuah Aizawl FC-in mual sir aṭangin goal an nawr pui thei a; Leonce Dodoz, Lalkhawpuimawia, Rochharzela leh Isak Vanlalruatfela te an awm avangin football hmuhnawm an chhawp thei ang.
Fimkhur a ṭul
Aizawl FC hian Gokulam lamah goal thum khung mah se injury time-ah goal hnih an chhuah avangin an chakna zat chu 3-2 chauh a ni a, khelh ṭhat niah pawh point hloh thei an ni. Hei chauh hi a ni lo, Mizo club hian khualmuala Indian Arrows an hmachhawn ṭumin goal an khung thei lo a, point khat chauh an hlawh chhuak.
MPL champion AFC coach Gift Raikhan chuan, "Chak chiang saah kan indah lo. Indian Arrows hi an che rang a, min nawr chiam dawn lo a, amaherawhchu counter attack hmangin min vuak let an tum dawn a, kan fimkhur a ṭul a ni," tiin Vanglaini a hrilh.
Indian Arrows tan hian Mizo rawlthar zinga FIFA World Cup U17 khel hmasa ber Lalengmawia (Apuia) chuan bul a ṭan dawn. Arrows coach Floyd Pinto chuan, "Foreigner nei ve lo mah ila team dang hi kan el pha a, pressure kan nei lo a, ṭha takin kan khel ang," tiin a sawi.