City tan Anfield kulh bang a sang lua

Match 46 - chu chu Liverpool-in Anfield-a Premier League match a zawna an tlawm tawh loh zat a ni a, Manchester City meuh pawhin an thlak danglam thei lo. 

Pathianni zan inkhel ngaihven hlawhah Liverpool chuan 3-1 in an elpui City an sawp a, Pep Guardiola leh a naute champion beiseina an lo beng daihsak. Liverpool tan Fabinho, Mohamed Salah leh Sadio Mane ten goal khat ṭheuh an khung a, City tana Bernardo Silva goal khungin awmzia a nei lo. 

Reds hian table chung berah match 12 khelin point 34 an nei ta a, anmahni hnaih bertu Leicester City aiin point riatin an sang zawk. Man City erawh palinaah chhuk thlain Reds hi point kuain an thlau tawh!

Jurgen Klopp hnuaia Liverpool insiamṭhat chhoh tirh khan Philippe Coutinho chu Liverpool-ah a la awm a, Mohamed Salah, Roberto Firmino leh Sadio Mane te nena an inkawp chu 'The Fabulous Four' tiin hminglem an pe. 

Liverpool-in 'The Fabulous' tia hminglem pek thar an nei a, 'Four' aiah 'One' hman a ṭul ta thung - a hming chu Fabinho a ni. Brazilian midfielder hian minute rukna lekah goal hmahruai a khung. 

Fabinho goal hi goal mawi bik a ni a, penalty area pawn aṭangin kawh zetin a khung. City an hawihai a, Anfield thawm erawh ring tak a ni. City an pawp laklawh a, Liverpool an phur laklawh thung. Minute ruk lek a liam hman chauh tihah Salah-a'n an goal hnihna a tauh lut leh a, Andy Robertson siamsak a ni. 

Anfield-a City len hmain Pep Guardiola-a'n Reds forward Mane chu player dive chingah a chhuah a, Spanish manager ṭawngkam hian inkhel tur boruak a ti ṭang sawt. 

Minute 51-naah Mane-a 'dive' ta ngei a, Senegalese forward dive dan erawh Pep-a sawi angin a ni lo. Reds captain Jordan Henderson-a ball cross duhawm tak chu Mane hian dive chungin a lo tauh lut a, 3-0 a ni der!

Mangang takin khelmual sirah Pep Guardiola a sapatal a, a hmelah lungngaihna hmuh tur a awm - khawvel manager ropui ber pawl hmela lungngaihna tuhtu chu Liverpool an ni a, Pep a hawihai. 

Minute 78-naah Bernardo Silva chuan City tan a khung ve zuk a, beiseina tlem insiam ve mah se hun a tlem tawh avangin City an tlawm zui. 

Liverpool-in league match 12-ah vawi 11 hnehna an chang ta a, point riatin hma an hruai fal mek. Manchester United (1993-94) kha Premier League-a match 12 khelha hei aia sanga (9 points)  hmahruai thei awmchhun an ni. 

Pep-a'n inelna hrang hrangah match riat chu Jurgen Klopp a ngam tawh lo a, German coach hi manager zinga a ngam loh ngun ber a ni - coach dang zawng aiin vawi thumin a ngam lo ngun zawk. 

Anfield-ah Pep hi vawi li a tlawm tawh a, khualmuala a tlawm ngunna ber a ni. 

Pep hian match 12-ah point 25 City a neihpui a, top flight football-a match 12 hnua point a la neih tlem ber a ni!

Liverpool-in Premier League match 17-a City an mikhual hnuhnungah tlawm an la nei lo. Vawi 12 an chak a, vawi nga an draw. 

Salah-a'n Anfield-a match 60-a khelah goal 51 a khung a, assist vawi 18 a nei - City a mikhual match liah vawi thum goal a khung. 

August 2018 hnu khan Sadio Mane chuan Anfield-ah Premier League goal 22 a khung a, hetihchhung hian khelmual khata heti zat league goal nei thei an awm lo. 

Season hmasa ṭantir aṭang khan Bournemouth tana assist 16 neitu Ryan Fraser tih loha Premier League assist ngah chu Liverpool full-back Andrew Robertson (15) a ni.